Despois de que numerosos xulgados galegos ditasen sentenzas a favor das demandas presentadas polos servizos xurídicos da CIG, a xustiza europea recoñece agora o dereito do profesorado interino a cobrar sexenios. Esta sentenza do alto tribunal europeo supón o remate da disputa sobre a discriminación dos docentes interinos ao respecto do funcionariado de carreira nas súas retribucións.

O Conselleiro de Educación tardou máis de 40 días en responder negativamente á exixencia da CIG-Ensino de restabelecer o dereito do profesorado de ter a matrícula gratuíta na Universidade. Trátase doutra medida máis de desconsideración co profesorado na carreira do actual Conselleiro, pois a Consellaría podería facer posíbel a continuación deste dereito coa transferencia económica correspondente.