Delegados e delegadas da CIG concentrados diante da Consellaría de Traballo e Benestar Social este mércores 27 de novembro entregaron no Rexistro da Xunta 981 sinaturas de traballadores e traballadoras do Consorcio Galego de Servizos de Igualdade e Benestar esixindo a aplicación do V Convenio Laboral da Xunta de Galiza incluídas as retribucións, entre outras medidas.

A CIG denuncia a situación de precariedade laboral na que se atopan as máis de 1.000 traballadoras e traballadores do Consorcio, sen convenio de referencia, e con salarios que non chegan nin aos 1.000 euros,  aos que se lles aplicaron tamén as reducións nas súas retribucións, incluído o recorte das súas pagas extra.

No escrito presentado este mércores, referendado por  981 adhesións de traballadoras e traballadores do Consorcio, tamén se inclúe a demanda de mantemento de todos os postos de traballo do Consorcio Galego de Igualdade e Benestar na integración na Axencia Galega de Servizo Sociais. 

Entre as demandas que se lle fan á Consellaría figura a de que se garanta  a continuidade das traballadoras do Plan de Inclusión a partires de 2013, a restitución dos salarios e das pagas extraordinarias completas, transparencia e publicidade na xestión das listas de agarda e a autorización para a realización de permutas entre as traballadoras e traballadores do Consorcio Galego de Igualdade e Benestar.