Conseguimos reunirnos co xerente e que este se comprometera a iniciar a negociación, como moi tarde en xaneiro
Peche e concentracións nos centros de traballo esixían a apertura de negociacións do convenio
Delegados/as da CIG pecháronse esta mañá na sede central do Consorcio Galego de Igualdade e Benestar (Galiña Azul, I+B, Centros de Día, Servizos centrais...) en demanda, entre outros, da aplicación do convenio colectivo único para o persoal laboral da Xunta de Galiza. O peche, que comezou contra as 12:00 horas, mantívose até que foron recibidos polo xerente do organismo. Tras da xuntanza, na que participaron as/os representantes das/os traballadoras/es xunto a representantes da CIG-Ensino e CIG-Administración, deron por finalizada a concentración. O xerente comprometeuse a iniciar unha negociación, como moi tarde en xaneiro.
Arredor de 70 delegados/as do Consorcio e representantes da CIG pecháronse este mércores na sede central do organismo co obxectivo de ser recibidos polo xerente para exixir o inicio inmediato dun proceso negociador para aplicar a todo o persoal do Consorcio no Convenio único de persoal laboral da Xunta de Galiza.
Paralelamente a este peche de delegadas e delegados houbo concentracións diante dos centros de traballo apoiando este peche e esixindo o comezo das negociacións.
Xunto a isto, demandaron que se resolvan todas as irregularidades que se están a dar na actualidade no que ten que ver coa xestión de listaxes, substitucións, cobertura das baixas, modalidades de contratos, falla de recursos materiais e humanos, despedimentos e oferta formativa suficiente, entre outros.
Do mesmo xeito, demandaron que se mellore e se faga pública a xestión das listas de contratación e substitución, aplicando os criterios que rexen para o resto do persoal da Xunta; que se atenda en tempo e forma as demandas das diferentes necesidades dos centros e que se estabilicen os cadros de persoal, para o que entenden que é necesario negociar o acceso á condición de laboral fixo.
Estes foron os puntos expostos ao xerente na entrevista que mantiveron as/os representes das/os traballadoras/es e representantes da CIG-Ensino e CIG-Administración, logo de manifestarlle o seu malestar por ter que recorrer a un peche para seren recibidas/os. Na xuntanza expuxeron que é totalmente inxustificábel que logo de dous anos os responsábeis non se moveran un ápice para mellorar as condicións de traballo de máis de 1.000 traballadoras/es que conforman o cadro de persoal do Consorcio. Máis se temos en conta que cando tomou posesión este goberno había un acordo de convenio asinado pola representación sindical e a anterior dirección do consorcio e referendado unanimemente polos catro comités de empresa.
Anxo Louzao, secretario nacional de CIG-Ensino, lembra que “o PP o que fixo foi non ratificar ese acordo de convenio, o que supón que este colectivo de traballadores/as estean totalmente en precario, cunhas retribucións dun 30-40% menores que o resto dos colectivos da administración autonómica realizando o mesmo traballo e desenvolvendo as mesmas funcións”.
A CIG exixiu, na reunión, fixar un calendario de negociacións co obxecto de aplicar inmediatamente o V Convenio Colectivo Único para a o Persoal Laboral da Xunta de Galiza.
Ao remate da xuntanza deron conta aos concentrados da posición do xerente. Segundo explicaron, este entendeu que “nos sobraba a razón, xa que compromisos anteriormente acordados non se efectivizaron, pero que, desta volta, asumía como compromiso firme o inicio da negociación en decembro ou, como moi tarde, en xaneiro”. Negociación que pretendía vincular ao traspaso do Consorcio á Axencia Galega de Servizos Sociais e a súa posta en marcha. Unha proposta que non foi aceptada pola CIG, que conseguiu que se comprometera a que, con independencia do futuro desta, no mes de xaneiro iniciaríanse as negociacións.
En relación coa xestión transparencia das listas de agarda e da posibilidade de mobilidade e estabilidade das/os traballadores/es do Consorcio manifestou que estaba imposibilitado para atender as demandas presentadas por limitacións de persoal e de loxística.
A CIG, logo dos precedentes nas actuacións da consellaría de Traballo e Benestar, que malia este nome non ten problemas para despedir traballadores/as e precarizar até límites insospeitados as condicións laborais do persoal e o incumprimento dos acordos acadados vai estar vixiante e continuará coas mobilizacións até que se efectivice e se aplique en toda a súa amplitude o convenio para melloras as retribucións, antigüidade, condicións laborais, mobilidade... co que conta o resto do persoal laboral da Xunta de Galiza.
Podes ver as fotografías das concentracións e dos peches nas seguinte galería de fotografías