A Comisión paritaria do Convenio Colectivo do PDI laboral mantivo na tarde do 7 de abril unha segunda reunión negociadora logo do acordo acadado entre a CIG-Ensino e as demais organizacións sindicais coas tres universidades para estender o pago dos trienios ao persoal investigador dos programas de Recursos Humanos (predoutorais e posdoutorais).

Na reunión a CIG-Ensino puxo enriba da mesa as seguintes cuestións: 

• Aprobar na propia reunión unha data de efectividade e de aplicación para o pago dos trienios a todo o persoal investigador dos programas de RR.HH. (pre e posdou).
• Acordar a extensión deste dereito a todas as figuras temporais que a día de hoxe non perciben trienios, con independencia de que sexa do capítulo I (profesorado asociado) ou do Capítulo VI (vinculado a proxectos de investigación).
• Pactar no marco temporal de 3 meses acordado na reunión do mes de marzo os temas que se deben incluír na negociación, entre os que deben estar a extensión do pago dos sexenios, quinquenios e outros complementos ao maior número posíbel de modalidades de contratación. 

A CIG-Ensino lamenta profundamente o cambio que se produciu por parte da representación das tres universidades entre a reunión no Consello Galego de Relacións Laborais (forzada polo escrito presentado pola CIG e outros dous sindicatos) e esta xuntanza. Así, malia que non negaron en ningún momento que todas as figuras de contratación pre e posdoutorais en cuestión teñen dereito ao cobro de trienios (algo que figura expresamente na acta da primeira reunión¹) non se moveron da posición de non formular ningunha proposta de datas efectivas para recoñecer o dereito nin de cando se faría efectivo, poñendo como escusa que non fixeran os cálculos económicos do que esta medida implicaría.

Diante do peche en banda das tres universidades e logo de máis de tres horas de reunión, as catro organizacións sindicais presentamos unha proposta para poder avanzar con paso firme na negociación:

Os representantes das Universidades de Santiago, A Coruña e Vigo, unha vez recoñecido o dereito ao pagamento da antigüidade ao persoal investigador dos programas de RRHH (pre e pos), acadan coas organizacións sindicais o compromiso de presentar unha memoria económica dos efectos deste recoñecemento e unha proposta das datas de efectividade e aplicación deste dereito. Esta proposta presentarase na vindeira reunión da Comisión Paritaria. 

Os representantes das Universidades de Santiago, A Coruña e Vigo recoñecen o dereito de todo o persoal vinculado ao Convenio Colectivo a percibir a antigüidade, comprometéndose a presentar unha proposta sobre o persoal afectado, así como unha memoria económica dos efectos do recoñecemento deste dereito.

A representación dos equipos de goberno rexeitou acadar o compromiso de presentar xa unha proposta con datas e limitouse a confirmar que remitirán á representación sindical un informe económico para unha futura reunión. Para a CIG-Ensino a postura dos equipos de goberno das Universidades, así como algunha táctica sindical difícil de entender, deixan moi tocada a negociación e demostran unha mala praxe negociadora e unha nula intención de chegar a acordos que melloren as condicións retributivas do PDI. 

Con todo, a CIG-Ensino non dá por rotas as negociacións e fica á espera dunha rectificación dos e das responsábeis das tres universidades, deixando claro que nunca aceptaremos que o recoñecemento efectivo dun dereito (neste caso o pago de trienios) poida verse bloqueado polas tácticas dilatorias evidenciadas na reunión ou pola escusa do importante gasto económico que implica. Son dereitos e non imos renunciar a eles. 

¹TEXTO INCLUÍDO NA ACTA DA COMISIÓN PARITARIA DO 17 DE MARZO DE 2021: Tras o oportuno debate e intercambio de pareceres, as universidades da Coruña, Santiago de Compostela e Vigo recoñecen o dereito deste persoal a percibir o complemento de antigüidade e propoñen normalizar o funcionamento da Comisión Paritaria, dotándoa dunha sede e nomeando unha presidencia e unha secretaría, en orde a resolver o exercicio efectivo deste dereito, tal e como se regula no artigo 15.6 do Estatuto dos Traballadores, así como para negociar unha serie de temas relacionados coas condicións laborais e retributivas do persoal temporal ao que lle é de aplicación o II Convenio Colectivo do PDI Laboral das tres universidades galegas.