A Xustiza dálle a razón á CIG-Ensino e obriga a Educación a ofrecer recoñecemento médico periódico ao profesorado
A CIG-Ensino interpuxera unha demanda de conflito colectivo por negarlle este dereito a máis de 30.000 traballadores/as do ensino
A CIG-Ensino fai unha valoración positiva desta sentencia pero lamenta a actitude dos responsables da Consellaría que obrigaron a ter que recorrer a xustiza para que se cumpra a Lei de Prevención de Riscos Laborais. “Que a CIG-Ensino se vexa obrigada a presentar unha demanda de conflito colectivo ante o TSXG para que se posibilite o exercicio deste dereito é unha mostra máis da desconsideración e o desprezo co que esta Consellaría trata aos seus traballadores e traballadoras ao negarlles, durante todo este tempo, un dereito, o da revisión médica- que, desde hai 17 anos, a lexislación laboral obriga a cumprir a todas as empresas e administracións -sinala Anxo Louzao. A CIG-Ensino esixirá que se cumpra esta sentencia que implica que o profesorado que o desexe poida facerse revisión médica neste ano”; engade.
A CIG-Ensino xa tiña esixido a cobertura deste dereito en repetidas ocasións á Consellaría de Educación sen que até o de agora fose atendida esta demanda. Por esta razón, no ano 2008, o sindicato presentou no Valedor do Pobo unha queixa. Daquela Educación respondeu que estaba a avaliar os custes e a catalogar os riscos pero despois de 3 anos e medio desde a contestación ao Valedor do Pobo, Educación seguía sen prestar a cobertura deste dereito recollido na Lei 31/1995 de Prevención de Riscos Laborais, dispensando, desta maneira, un trato discriminatorio a un colectivo de aproximadamente 33.000 traballadores/as.