A CIG-Ensino presentou un escrito ante a Consellaría de Educación para esixir a retirada das instrucións que modifican a xestión dos comedores escolares para o curso 2012-2013, sexan ou non de xestión directa da Consellaría. A CIG-Ensino considera que a Administración Educativa actúa unha vez máis con escurantismo, ao enviar estas instrucións con cambios de calado unha vez finalizado o curso, e con autoritarismo, pois estas instrucións deberían ter pasado pola Mesa Sectorial, e ter sido debatidas coas organizacións sindicais.

Por este motivo, a CIG-Ensino presentou un escrito pedindo a suspensión destas instrucións e que, en todo caso, se traten na Mesa sectorial no vindeiro curso escolar, a partir de setembro, pois o mes de xullo, non lectivo, non sería o momento para tratar tema ningún na Mesa Sectorial por non estar o profesorado nos centros.

Por outra banda, a CIG-Ensino ten coñecemento de que a Consellaría está enviando instrucións aos centros no sentido de reducir as prazas ofertadas, contravindo a lexislación vixente en canto á clasificación dos comedores escolares, pois, por exemplo, pretenden que os comedores tipo A que até agora podían ter até 75 comensais, agora teñan só 71 comensais. 

Podes descargar o escrito enviado ao conselleiro na seguinte ligazón