A Xefatura territorial da Consellaría de Educación da Coruña e da Inspección veñen de enviar ás direccións dos centros de ensino público, hoxe, 26 de xaneiro, un correo electrónico no cal lles solicita as previsións do profesorado e do resto do persoal do centro que ten previsto exercer o dereito á folga. Así mesmo as inspeccións dedicáronse hoxe pola mañá a chamar aos centros no mesmo sentido. Nesta mesma nova podes atopar a hora e lugar das distintas mobilizacións

É inadmisíbel, amais de ilegal, que a Consellaría pretenda condicionar o exercicio fundamental do dereito á folga do profesorado, xa que ninguén está obrigado a declarar de antemán a súa intención de ir ou non á folga, xa que esta está convocada para todos os traballadores e traballadoras. Ao mesmo tempo, temos que denunciar que, unha vez máis, a Consellaría pretende instrumentalizar a dirección dos centros, obrigándoas a efectuar funcións ilegais e a responder preguntas que están pensadas exclusivamente para combater a folga.

A CIG-Ensino exixe a rectificación inmediata da Consellaría, do contrario non desbotamos emprender accións legais. Ao mesmo tempo, indicámoslles ás direccións dos centros que non están obrigados a mandar datos sobre a previsión da folga. 

Horas e lugares das mobilizacións do día da folga.

 

Os horarios das manifestacións e concentracións que se celebrarán coincidindo coa folga xeral do 27-X, coa que se pretende rexeitar a reforma das pensións do Goberno español, son os seguintes:

Vigo. Ás 12.00 horas dende o Cruce da Doblada.

A Coruña. Ás 12.00 horas dende a Praza de Vigo.

Cee. Ás 12.00 horas na Praza do Concello (concentración).

Pontevedra. Ás 12.00 horas dende a Praza da Ferrería.

Vilagarcía. Ás 12.00 horas dende a Casa do Mar.

Ferrol. Ás 12.30 horas dende a avenida de Esteiro (local da CIG).

Santiago de Compostela. Ás 12.30 horas dende a Praza Roxa.

Lugo. Ás 12.00 horas dende a Ronda da Muralla, 58 (local da CIG).

Burela. Ás 12.00 horas dende a rúa Arcadio Pardiñas, 137 (local da CIG).

Ourense. Ás 12.00 horas dende o Pavillón dos Remedios.

Verín. Ás 11.30 horas dende a Praza do Concello.

Xinzo. Ás 11.30 horas dende a Praza do Concello.

O Barco. Ás 12.00 horas na Praza do Concello (concentración).

Ribeira. Ás 12:00 horas dende a Praza do Peixe.