Anxo Louzao, secretario nacional de CIG-Ensino considera que este referendo vén reafirmar, con toda rotundidade, xa que puideron participar directamente todos e cada un dos profesores/as, “o rexeitamento á política educativa da consellaría de Educación, ancorada no desmantelamento do ensino público, no deterioro da súa calidade e na desconsideración e descrédito permanente do conxunto do profesorado”. NO INTERIOR DESTA NOVA TES TODA A INFORMACIÓN DO REFERENDO INCLUSO CENTRO A CENTRO.

19.182 profesores/as do ensino público votaron en contra dos recortes na Educación Pública

Escrutado o 100% dos votos emitidos no referendo do profesorado do ensino público do pasado 25 de outubro, o resultado é que 19.182 profesores e profesoras, dun total de 26.271 electores de 863 centros de ensino, votaron en contra dos recortes na educación pública. A CIG-Ensino agradece a alta participación e o compromiso amosado polos docentes en defensa do ensino público.

Ante este resultado Louzao exixe  da consellaría a retirada da orde que impón o incremento do horario lectivo do profesorado e a vixilancia do transporte escolar e o cese nos ataques ao ensino público, mentres beneficia o privado-concertado.

“Resulta provocador e pernicioso que aínda hoxe, coñecendo a opinión do profesorado, o Presidente da Xunta afirme que a maioría dos docentes están de acordo coa súa política educativa”, afirma o secretario nacional de CIG-Ensino, quen engade que “esta afirmación amosa a falta do mínimo pudor e confirma que estamos ante un goberno que ten a mentira e o engano como únicas pautas de actuación”.

Para Louzao, o presidente do goberno galego, o que ten que facer é “non faltar á verdade e actuar con dilixencia para cesar o conselleiro de Educación, que o único que ten no seu haber é o continuo afán de desprestixiar o profesorado e destruír o ensino público”.

CIG Informa valoración do referendo: Ligazón

Cartaz valoración do referendo: Ligazón

Resultados referendo: Ligazón

Resultados referendo centro a centro: Ligazón

Información sobre o proceso do referendo: Ligazón