Este luns 29 de xuño, unha delegación dos seis sindicatos representativos do sector do ensino concertado acudiu ao encontro do conselleiro de Educación, Román Rodríguez, e do seu director xeral, J.M. Bértolo, para instalos a cambiar o rumbo das políticas educativas do goberno do PP na Xunta de Galiza e sentarse dunha vez a negociar as reivindicacións do persoal traballador na Mesa Tripartita da Concertada, que debe deixar de ter unha función unicamente informativa e impositiva por parte da Consellaría.

Para acadar este encontro, as organizacións sindicais aproveitaron un acto da patronal Escolas Católicas celebrado en Santiago, “Encontro de educadores/as”, ao que estaban convidados tanto o conselleiro coma o director xeral de centros, para “bendicir” a inauguración. Na mesma entrada ao acto, repartíronse folletos reivindicativos informativos entre os centos de traballadores e traballadoras asistentes. A Román Rodriguez fíxoselle entrega dun escrito coas “Principais reivindicacións do persoal traballador”, que o pasado día 26 de xuño xa se fixeron públicas en tres concentracións diante da súa Consellaría en Santiago e nas Delegacións Territoriais de Vigo e Coruña coa lectura dun manifesto, no que tamén se demandaba un calendario de negociacións para este colectivo que atende aproximadamente o 30% do alumnado galego das etapas non universitarias.

Así e todo, tralas claras mensaxes enviadas nas últimas mobilizacións, tanto o conselleiro coma o director xeral parecen non comprender a transcendencia do fastío de traballadores e traballadoras que están a ver como dende hai máis de dezaoito anos as súas condicións laborais, sociais e salariais se van precarizando.

O seguinte paso, se a Consellería segue coa súa inoperancia, será unha folga no primeiro día do curso, o 9 de setembro.