O Ministerio de Ciencia, Innovación e Universidades presenta  neste final de ano o borrador do Real Decreto de especialidades de coñecemento e ámbitos de coñecemento que amplía as primeiras desde a 191 actuais ás 346 e fixa os segundos en 52. 

O Ministerio convocou ás organizacións sindicais a unha reunión informativa, que non de traballo, a 23 de decembro enviando unhas horas antes o borrador dun futuro real decreto no que se cambian as actuais áreas do ámbito universitario e se crean ou transforman a especialidades e ámbitos de coñecemento. 

As especialidades de coñecemento teñen un papel fundamental no que será o cadro de persoal docente investigador nestas institucións, que veñen a substituír as denominadas “áreas”, e que son as que van determinar os perfís das prazas futuras e actuais das universidades.

Desta forma o obxectivo deste real decreto é determinar as especialidades de coñecemento a efectos de establecer os perfís dos concursos das prazas do PDI das universidades públicas e os ámbitos de coñecemento a efectos de adscrición dos postos de traballo do profesorado.

O documento contén un cadro de 346 especialidades (actualmente hai 191) e 52 ámbitos de coñecemento aos que estará asignado cada posto de traballo logo dun proceso de adscrición que regulará cada universidade. 

Sen proceso de negociación

O Ministerio escúdase en que esta modificación do actual real decreto é fundamentalmente académica e o proceso de elaboración foi negociado coas distintas facultades e decanatos para xustificar non ter convocado con anterioridade a representación laboral do PDI. 

Desde a CIG Ensino trasladouse a preocupación pola falta de negociación en temas tan fundamentais como as especialidades e en ámbitos condicionantes das prazas que están directamente relacionadas coa mobilidade do profesorado. 

Durante a reunión pediuse tamén que se informe sobre a planificación da negociación coas organizacións sindicais. A resposta é que se nos convocará a unha reunión de traballo para a primeira quincena de xaneiro e máis alá deste proceso de negociación este borrador pasará a exposición pública aproximadamente en febreiro porque en marzo pretenden concluír todo o proceso para poder aprobalo a finais dese mes. En canto á súa entrada en vigor sería a partir da súa publicación cunha marxe de un ano de aplicación do mesmo por parte das universidades.