Cun peche no IES Torrente Ballester de Pontevedra rematou este sábado 26 de abril a campaña de peches rotatorios en centros educativos en todo o país en contra da LOMCE e os recortes no ensino público, organizados pola Plataforma Galega en Defensa do Ensino Público. A Plataforma Galega en Defensa do Ensino Público valora positivamente estes peches que se foron sucedendo en 15 centros de ensino, contando coa participación de nais e pais, profesorado e alumnado, e que terán continuidade na folga no ensino convocada para o próximo 9 de maio. Estes peches evidenciaron máis unha vez a necesidade da retirada da LOMCE por tratarse dunha lei que expulsará do sistema educativo o alumnado con menos recursos, afondará na españolización do ensino, potenciará a privatización, liquidará a xestión democrática dos centros e ampliará a súa confesionalidade.

Os peches iniciáronse o 9 de abril no IES Rosalía de Castro en SANTIAGO DE COMPOSTELA foron rotando durante todo o mes de abril por A CORUÑA (IES Menéndez Pidal), CARBALLO (IES Alfredo Brañas), FERROL (CIFP Ferrolterra), A GUARDA (IES A Sangriña), CARBALLO (IES Alfredo Brañas), CANGAS (IES Rodeira), LALIN (CEIP Xesus Golmar), LUGO (IES As Mercedes), VERÍN (IES Xesús Taboada Chivite), BURELA (IES Monte Castelo), OURENSE (Xefatura territorial), CAMBADOS (IES Ramón Cabanillas), RIBEIRA (IES Nº 1), VIGO (IES San Tomé Vigo), GONDOMAR (IES Terra de Turonio) e PONTEVEDRA (IES Torrente Ballester).

As accións para amosar a oposición da comunidade educativa á LOMCE continúan o 9 de maio coa folga no ensino e as manifestación e concentracións convocadas pola Plataforma Galega en Defensa do Ensino Público para ese día e que son as que se detallan a continuación:

• OURENSE: Xefatura territorial
• VIGO: Praza dos Cabalos
• FERROL: Praza de España/Praza de Armas
• VILAGARCÍA: Praza de Galiza
• PONTEVEDRA: Praza da Ferrería
• A CORUÑA: Praza de Vigo
• LUGO: Praza da Horta do Seminario
• BURELA: Praza da Mariña. (Concentración)
• SANTIAGO: Praza do Toural

Galería de imaxes dos peches

 

A Plataforma Galega en Defensa do Ensino Público iniciou no IES Rosalía de Castro de Compostela os peches contra a LOMCE e os recortes

Os peches contra a LOMCE e os recortes comezan este martes 9 no IES Rosalía de Castro de Santiago

A Plataforma Galega en Defensa do Ensino Público fará peches nos centros de ensino durante todo o mes de abril contra a LOMCE e os recortes