A Consellaría de Educación vén de aceptar en vía administrativa un recurso de reposición presentado polos servizos xurídicos da CIG-Ensino en nome dun docente con contrato de substitución que foi cesado con data 30 de xuño de 2013. No seu contrato, como acontece con todo o profesorado substituto, figuraba como data de remate a incorporación do titular ou como data tope o 30 de xuño do curso escolar. Porén, neste caso o titular xubilouse antes de finalizar o curso, ficando vacante a súa praza. Desde a CIG-Ensino sempre demandamos da Consellaría que non aplicase ningún criterio discriminatorio, independentemente de cando se producise a vacante. Malia iso, a Consellaría negábase a aceptar a extensión do contrato ao curso completo se este cambio tiña lugar a partir do mes de abril. Así, neste caso como noutros, a Consellaría de Educación, en vez de converter o contrato de substitución nun de interinaxe (até 16/09/2013 ao se tratar dun posto de PES) decidiu cesalo a 30 de xuño.

En resposta a un recurso de reposición presentado contra ese cese, a Consellaría acepta agora que non existen razóns legais para non modificar o contrato, e afirma que coa xubilación do titular desaparece a posibilidade da súa incorporación, manténdose a necesidade temporal da cobertura da praza, polo que se debe aceptar que pase a un contrato de interinaxe de curso completo.

Desde a CIG-Ensino amosamos a nosa satisfacción por ter conseguido este cambio de criterio da Consellaría e esiximos que o aplique a todo o persoal que se atope en idéntica situación.

CIG INFORMA Ligazón