Esta mañá celebrouse, en Compostela, unha asemblea do profesorado das EEOOII, convocada pola CIG e as outras organizacións sindicais, na que participaron profesores e profesoras da práctica totalidade das EEOOII de Galiza.

 O profesorado das EEOOII acorda continuar as mobilizacións en demanda da retirada da circular 5/2009

Na asemblea celebrada hoxe en Compostela acordáronse novas medidas de mobilización

 Esta mañá celebrouse, en Compostela, unha asemblea do profesorado das EEOOII, convocada pola CIG-Ensino e as restantes organizacións sindicais , na que participaron profesores e profesoras da práctica totalidade das EEOOII de Galiza.

 Na asemblea, fíxose unha valoración moi positiva das mobilizacións realizadas até o de agora e acordouse continuar con outras medidas de presión para seguir reclamando da Consellaría a retirada da circular 5/2009 e a apertura de negociacións, xa que Educación segue sen atender as lexítimas demandas do profesorado.

 Por outro lado, o profesorado denunciou a situación actual das EEOOII con continuos cambios, por parte da inspección, nos horarios que, a día de hoxe, aínda non foron aprobados con carácter definitivo en moitas escolas. Por outro lado, mostraron a súa preocupación ante a actitude da Consellaría que lles está a impor a realización de determinados cursos monográficos, cando a proposta destes cursos lle compete ao Consello Escolar da EOI e debería ter sido feita ao finalizar o curso pasado, polo que a Administración está a vulnerar as canles regulamentarias para esta proposta.

 Tras as propostas realizadas polas organizacións sindicais, a asemblea acordou levar a cabo as seguintes medidas:

Trasladarlle aos Directores Xerais de FP do resto do Estado cal está sendo a actitude do seu homólogo galego, ao impoñer unha circular sen negociala e utilizar os medios de comunicación para difamar os traballadores das EEOOII.

• Promover que os concellos aproben mocións en defensa das EEOOII.

• Trasladar a problemática das EEOOII ao Valedor do pobo (acción que se realizará este mesmo venres, día 13)

• Realizar aulas na rúa como medida de protesta e para sensibilizar a cidadanía. Esta acción iniciarase o día 19 de novembro na Coruña e irase desenvolvendo noutras cidades e localidades do país, até o día 17 de decembro.

• Realizar unha marcha entre o Monte do Gozo e o Obradoiro, o 23 de xaneiro.

 

 

Santiago de Compostela, 10 de novembro de 2009