O vindeiro 20 de outubro comezarán as actividades do Correlingua 2021 baixo o lema "Inmunízate co galego" que terán como principal oferta oito concertos en outras tantas poboacións galegas comezando por A Coruña e se prolongarán até novembro por toda Galiza.

A presentación das actividades Correlingua 2021

As actividades completas de Correlingua para este outono foron presentadas na Deputación da Coruña pola deputada de Normalización Lingüística e Igualdade, María Muíño, Suso Bermello, secretario nacional da CIG Ensino; e Patricia Varela, presidenta da AS-PG. Tamén participaron na presentación a medios, o presidente de Correlingua, Anxo Terán; e a representante da Mesa pola Normalización Lingüística, Celia Armas. No Correlingua 2021 colaboran as deputacións de A Coruña, Lugo e Pontevedra, e os concellos de A Coruña, Pontevedra, Vigo, Ferrol, Bueu, A Estrada, Verín e Foz.

Tras dar a coñecer nos pasados meses os gañadores e gañadoras dos concursos de Cantalingua, e os de vídeo e banda deseñada, máis o manifesto gañador para esta edición 2021 de Correlingua, a partir do 20 de outubro comezarán as actividades ao vivo co alumnado dos distintos centros. Ademais dos concertos, este Correlingua 2021 ofrecerá actividades como obradoiros de escrita creativa, obradoiros de regueifas e banda deseñada e outras actividades de pequeno formato para desenvolver nos centros como a nomeada Palabras sobre o vento.

As Festas serán emitidas en directo por You Tube para que o alumnado poida ver os espectáculos nas propias aulas.  Os oito concertos que se celebrarán fóra dos centros terán unha asistencia media de 200 alumnos e desenvolveranse baixo o sistema de aula burbulla para garantir as medidas sanitarias, e que supón unha novidade con respecto á edición anterior do Correlingua. Sobre esta segunda edición de Correlingua en tempos de pandemia falou a deputada responsable de Normalización Lingüística da Deputación da Coruña, María Muíño, salientou a importancia de actividades como o Correlingua para "defender o dereito a medrar e a vivir en galego". Muíño apuntou que este é "un dereito que agora mesmo non está garantido".

Para Suso Bermello, secretario nacional de CIG-Ensino, Correlingua leva vinteunha edicións e hai que preguntarse que fan organizacións como as que están impulsando este evento "facendo o traballo de defensa do idioma que non está facendo nin a Xunta de Galiza nin a Consellaría de Educación". Bermello engadiu que todos os estudos e todos os datos "sinalan a mala situación do uso do galego no ensino, confirmado no dato de que 3 de 4 escolares que acaban o ciclo de estudos obrigatorios descoñecen o galego".

Patricia Varela, presidenta da AS-PG lembrou o lema desta vixésimo primeira edición do Correlingua, "Inmunízate coa lingua", para explicar que non "é accesorio porque o Correlingua non son só as festas finais". Relatou todas as actividades que rodean a este evento: os concursos de vídeo, de banda deseñada ou o que escolle o manifesto de cada ano. "Son actividades que fan que o alumnado sexa protagonista dentro e fóra das aulas", sinalou Varela. Engadiu tamén que as actividades queren ser motivadoras do uso do galego na aula e que ese uso teña continuación fóra.

Actividades en centros de ensino

A organización do Correlingua asegura unha importante cantidade e variedade nas actividades que se levarán a cabo nos centros educativos. Haberá obradoiros de creación colectiva de Regueifa, Banda Deseñada e de Escrita. Tamén se organizarán contacontos e actuacións musicais de pequeno formato. Tanto nos obradoiros como nas outras actividades procúrase que as persoas que os imparten e actúen sexan escritoras e artistas da propia provincia.