A secretaria nacional da CIG-Ensino, Laura Arroxo, interpelou á directora xeral de FP, María Eugenia Pérez, sobre o caos que está sendo este inicio de curso nestas ensinanzas e lembroulle a negativa da Consellaría a retrasar comezo ao 15 de setembro, tal e como lle pediu o sindicato. Neste sentido citou os erros que está a dar a aplicación Proens para elaborar as programacións e a improvisación de comezar a impartir o novo módulo de Afondamento nas competencias profesionais sen tempo para elaborar o seu currículo. Ademais criticou a Consellaría por desatender a petición de retirar este proxecto de Decreto e iniciar de novo a súa negociación porque “vai significar a fin da Formación Profesional”.

A CIG-Ensino foi, das 9 entidades que conforman o Consello Escolar de Galiza, a que presentou máis emendas ao articulado do Proxecto de Decreto polo que se establece a ordenación xeral da formación profesional do sistema educativo galego, un total de 36 ao articulado e unha emenda á totalidade na que se pedía a retirada do proxecto e a negociación desde cero “esta vez si negociada co profesorado” dun novo texto. Para o sindicato maioritario no ensino público unha norma que vai substituír o Decreto de 2010 e desenvolver a xa de por si lesiva lexislación estatal que reformou a FP non pode ser aprobada “por ser un ataque ao profesorado, o verdadeiro artífice do prestixio social que acadaron estas ensinanzas nos últimos anos”.

Na súa emenda á totalidade a CIG-Ensino argumenta que desde o punto de vista sindical este proxecto é totalmente rexeitábel por implicar unha redución do persoal docente, un empeoramento das súas condicións laborais, o incremento feroz da privatización destas ensinanzas e un empeoramento moi relevante da formación do alumnado.

“A Consellaría laméntase de que a reforma da FP estivo moi mal deseñada polo Ministerio pero as súas decisións non fan máis que empeorar a normativa estatal. A primeira delas, elevar ao máximo o tempo de formación na empresa cando a dual intensiva está a ser un fracaso e hai moitos ciclos que este ano ou ben non obtiveron matrícula suficiente para implantarse ou ben tiveron que deixar de ofertarse en primeiro ou ben o propio alumnado decidiu cambiar á dual xeral, mesmo deixando de cobrar”, sinalou Laura Arroxo. “Mentres  isto acontece -destacou- queda moito alumnado en listaxe de espera no réxime dual xeral, e empresas, academias, fundacións e demais entidades privadas lánzanse á caza desas matrículas porque mentres dure o diñeiro de Europa hai que facer negocio, coa venia da Consellaría”. A segunda decisión tamén criticada pola CIG foi a redistribución dos módulos e do seu horario dentro dos ciclos, deixando para segundo curso as 500 horas de formación na empresa obrigatorias, colocando tres dos novos módulos tamén en segundo (Dixitalización e os dous optativos de Habilidades e Afondamento) e duplicando a oferta de inglés a respecto do que estabelecía o currículo básico estatal. “Temos indicado en reiteradas ocasións que a Formación Profesional non está para solventar o coñecemento do inglés do seu alumnado e que cando este idioma é unha ferramenta de traballo xa ten entidade de módulo profesional. O alumnado de CM e CS pode complementar a súa formación en idiomas estranxeiros, non só en inglés, nas EOIs, sen necesidade de que se lle detraian 5 horas semanais en todos os ciclos aos módulos profesionais. Con todos os novos módulos que a Consellaría decidiu incorporar apenas a metade das 2000 horas dos ciclos se van a destinar a módulos profesionais impartidos nos centros educativos”, sinalou como crítica á actuación da Dirección Xeral de FP. A nivel práctico isto estase traducindo nunha “secundarización da FP” con moitos máis módulos de menos horas o que fai que cada docente poida impartir até un total de 10, algo insólito até agora neste nivel educativo.

A privatización chega ás entrañas da FP: ataque directo ao docente profesional

Mais sen dúbida o tema que centrou máis as emendas ao articulado do proxecto de Decreto foron as tres novas figuras, unha delas a maiores das contempladas no RD estatal 659/2023, que permiten que profesionais do sector privado poidan impartir docencia nos centros públicos sen requisitos de titulación específica nin de formación pedagóxica e nin sequera pasando un proceso de contratación pública, senón que poderán ser propostos directamente pola dirección dos centros. En opinión do sindicato nacionalista “a FP non pode ser nin o retiro dourado de profesionais das empresas nin o contexto para devolver favores”.

Finalmente todas as emendas da CIG-Ensino foron rexeitadas polo resto de membros do Consello Escolar, que ou ben votaron en contra ou se abstiveron.