As familias do alumnado levaron a cabo en cursos precedentes múltiples concentracións reclamando unha reforma integral do centro sen obter resposta ás súas peticións por parte da Consellaría.

O conselleiro de Educación foi increpado esta mañá cando visitaba o CEIP de Prácticas na Coruña por unha representación das familias do alumnado que levan varios anos reclamando que se arranxe o centro e alertan da perigosidade que supón para toda a comunidade educativa o estado das infraestruturas.

De feito onte mesmo producíronse desprendementos da cornixa, o que motivou un incremento do malestar de toda a comunidade educativa. Román Rodríguez desviou a responsabilidade cara á Universidade da Coruña, titular do edificio que cede espazo mediante un convenio á Consellaría. Mais as promesas e compromisos de proxectos técnicos non resultan suficientes para unha comunidade educativa que desenvolve a súa vida lectiva e laboral nun ambiente insalubre e perigoso para a súa integridade física. Aos reiterados atoamentos, humidades, avarías e deslucimentos do edificio súmase un novo desprendemento en espazos frecuentados por alumnado.

Para a CIG-Ensino, que estivo presente durante a protesta, resulta intolerábel que o máximo responsábel do ensino en Galiza permita que o alumnado de infantil e primaria da educación pública, así como o persoal docente e non docente dependente da Xunta de Galiza, reciba e preste servizos nunhas instalacións en mal estado que poñen en perigo a súa integridade. Desde a ANPA anuncian que retomarán as protestas e reclaman que o conselleiro asuma as súas obrigas.