Na reunión do Consello Xeral de MUFACE, que tivo lugar o martes 28 de marzo en Madrid, a Mutua do funcionariado civil do Estado, ao que pertencen obrigatoriamente todo o profesorado funcionario de carreira, trasladou unha serie de modificacións nas axudas sociosanitarias que cubre a entidade. Algunhas delas afectan só a persoas mutualistas obrigatorias e outras tamén a mutualistas beneficiarias (fillos e fillas...).

NOVIDADES NAS AXUDAS SOCIOSANITARIAS

• Atención a persoas de enfermidades celíacas: non será preciso aportar informe médico se se obtivo axuda na convocatoria do 2022.
• Incremento da contía da axuda para persoas con enfermidade oncolóxica: as axudas por próteses capilares será de 200 euros; por suxeitadores postumorectomía, postmastectomía e outras prendas de natureza similar pasan a 75 euros, mantendo un número máximo de 2 pezas por ano.

PRAZO DE SOLICITUDE: do 28 de marzo ata o 31 de decembro de 2023, inclusive.

MEDIOS DE SOLICITUDE: poden tramitarse a través da Sede Electrónica de MUFACE as seguintes solicitudes:

• Solicitudes do programa para facilitar a autonomía persoal nas súas tres modalidades:
  • Mantemento e potenciación da capacidade residual.
  • Eliminación de barreiras arquitectónicas (novidade na sede elec.).
  • Adquisición de medios e axudas técnicas (novidade na sede elec.).
• Solicitudes do programa de persoas en situación de drogodependencia (novidade na sede elec.).
• Solicitudes do programa para persoas con enfermidade celíaca.
• Solicitudes do programa de axudas para persoas con enfermidade oncolóxica.

BOLSAS DE ESTUDO PARA MUTUALISTAS 2023 (NON PARA PERSOAS BENEFICIARIAS)

• Revísase a contía das axudas á alza, incrementando a 275
• Poderán presentarse as axudas desde o seguinte día de publicación no BOE (prevista para mediados de abril) e realizarase exclusivamente a través da Sede Electrónica de MUFACE.

RECEITA ELECTRÓNICA

A implantación da receita electrónica segue mantendo dous ritmos diferentes. Para  mutualistas con asistencia sanitaria pública está xa dispoñíbel en todas as CCAA e as galegas e galegos xa podemos empregala en todo o estado.

A implantación da receita electrónica no caso da optar por entidades privadas só está implantada neste momento en Cantabria, Illas Canarias e Estremadura e irase implantando progresivamente nas demais CCAA, coa previsión de que estea vixente en todo o estado ao longo de 2024.

NOVIDADES NA APP MÓBIL MUFACE.

Na reunión informaron de que hai novidades e novos trámites que se poden efectuar desde a aplicación móbil:

• Integración co sistema de identificación electrónica Cl@ve PIN.
• Solicitude de prestacións dentarias.
• Solicitude de prestacións oculares.

Lembramos que xa existen outras funcións que se poden realizar desde a app:

• Localizar oficinas MUFACE.
• Servizo de petición de cita previa.
• Contactar coa Oficina de Atención ao Mutualista.
• Solicitar talonario de receitas.
• Solicitar Tarxeta Sanitaria Europea (TSE)
• Acceder á tarxeta de afiliación.
• Revisar o estado das solicitudes.

O sindicato chama a incrementar as axudas e a estendelas a todo o persoal

A CIG reitera a demanda de que se incrementen as axudas conxeladas desde hai anos. Estas axudas que cos recortes quedaron moi reducidas, son hoxe escandalosamente mínimas tendo en conta a evolución dos prezos e a limitación nas subas retributivas.

O sindicato critica igualmente á Xunta de Galiza por non estender estas axudas, como mínimo, a todo o persoal (lembremos que o profesorado interino non é mutualista). A negativa do goberno galego a recuperar o Fondo de Acción Social previo aos recortes ou a incorporar nel axudas como as que existen en MUFACE provoca novamente unha diferenciación inxusta.

Podes consultar as contías actuais de axudas sociosanitarias neste CIG-Informa. LIGAZÓN.