Imaxes da manifestación de Queremos Galego en Compostela

A plataforma Queremos Galego escolleu o lema “un idioma galego vivo é a mellor garantía dunha Galiza viva" para a manifestación deste ano ante a actual situación de emerxencia lingüística logo de que estean a piques de cumprirse 20 anos da aprobación do Plan Xeral de Normalización Lingüística que, lonxe de conseguir os seus obxectivos, se incumpre día a día.

"Para unha Galiza viva, activa e consciente das súas capacidades precisamos dun goberno realmente comprometido coa súa obriga de promover o uso, presenza e disposición do noso idioma", aseverouse nunha ateigada Praza da Quintana durante o acto final conducido por Isabel Risco, e que contou coa actuación do grupo Dakidarría 

O presidente da Mesa pola Normalización Lingüística e portavoz de Queremos Galego, Marcos Maceira, salientou no seu discurso final que "os pobos que aspiran a níveis altos de desenvolvemento social mantéñense e apóianse na normalidade da súa lingua para todos os usos e en todos os espazos, o que indica a fortaleza, autoestima e confianza en si propios". Maceira recordou, tamén, que "como fixo tantas veces Luísa Villalta", a sociedade galega que  se manifestou este 17 de maio polas rúas de Compostela "non fica impasíbel perante o xenocidio ao que está a ser sometido o pobo de Palestina". "A loita por Galiza e polo galego tamén é a solidariedade coa loita do pobo palestino", afirmou.

Vivir plenamente en galego

Previamente, o secretario xeral da CIG, Paulo Carril, xunto con representantes da Coordinadora de Traballadores/as de Normalización da Lingua, da AS-PG, de Erguer, da Asociación de Actores e Actrices de Galiza, de Galiza Cultura, e da Mesa pola Normalización Lingüística foron as persoas encargadas de dar lectura a un manifesto no que se denunciou que nestes 20 anos non só non se desenvolveron as 400 accións e medidas concretas recollidas no Plan Xeral de Normalización da lingua, senón que se produciron importantes retrocesos".

"Un futuro novo para o noso idioma é posíbel, resaltouse, mais precisamos dun ensino en galego que garanta a competencia no noso idioma permitindo a incorporación de novos falantes e o coñecemento da nosa realidade fronte ao actual modelo desgaleguizador". A este respecto, Queremos Galego trasladou a “preocupación social” polo datos que alertan de que o 24% das mozas e mozos de Galiza se manifesten incapaces de falar en galego, polo que un ano máis exixiuse a derrogación do Decreto 79/2010 do mal chamado plurilingüismo por converter o ensino nun dos principais elementos desgaleguizadores da sociedade.

Na mesma liña, reivindicouse un audiovisual que, como reclama a Iniciativa Xabarín, garanta a oferta en versión orixinal ou lexendada en galego e o cumprimento dos mínimos que estabelece a lei para crianzas de menos de 12 anos.

Tamén accións na administración, nos servizos públicos, na sanidade, na xustiza, nas relacións e información comercial, onde a atención inicial en galego -oferta positiva- que indicaba o PXNLG "debe ser garantida incluíndo a disposición da lingua nas xestións telefónicas, telemáticas ou presenciais". E un galego vivo tamén na pegada da lingua sobre o territorio en todos os seus espazos e lugares, respectando a toponimia galega -a única legalmente válida-, pero "que de novo pretenden borrar e perseguir coa permisividade dos gobernos central e autonómico", sentenciaron.