Na tarde deste xoves, as prazas das cidades galegas volvéronse encher de consignas en contra do proxecto de orzamentos da Xunta para 2013. Uns orzamentos que, denuncian dende a Área Pública da CIG, poñen en perigo a continuidade e a calidade dos servizos públicos, promoven a supresión de prazas e o despedimento de persoal, e deterioran aínda máis as condicións laborais e económicas dos traballadores e traballadoras das administracións.

A voceira da Área Pública da CIG, Maricarme López Santamariña, explicaba no transcurso da concentración celebrada na Coruña que desta volta as protestas promovidas pola Plataforma Galega en Defensa dos Servizos Públicos están centradas na oposición aos orzamentos da Xunta para 2013, xa que estes afondan na destrución de servizos públicos, van máis alá das directrices de recortes marcadas polo estado español e suporán o “toque de graza” para a débil situación dos servizos públicos.

Ao tempo, en Compostela, María Xosé Abuín, secretaria nacional de CIG-Saúde, aseguraba que as mobilizacións son cada vez máis necesarias “para que o PP entenda que son da cidadanía e que non ningún dereito a privatizalos e polos en mans das empresas dos seus amigos e dos seus achegados”. Abúín apuntou ademais que “a cidadanía cada vez é máis consciente de que, con estas políticas, os servizos públicos van perder calidade e van ter un custe engadido, porque imos ter que financialos através dun copago ou un repago dos mesmos”.

Tamén en Compostela estaba o secretario nacional de CIG-Ensino, Anxo Louzao, quen insistiu en que os orzamentos para 2013 “amosan a verdadeira faciana do PP”. Louzao considera que o obxectivo do PP “é a destrución de todo o que é público e a destrución da pouca calidade de vida dos cidadáns”; que pretende así “favorecer aos seus amigos e aos grandes grupos económicos” e advertiu que ese modelo favorece a corrupción, na medida en que “eses grandes grupos están ligados ao PP”.

Louzao lembrou que hoxe as empregadas e empregados públicos teñen un 20% menos de retribucións que en 2010 e que estes orzamentos prevén que “nos liquiden parte da paga extra e empeorar as nosas condicións laborais e retributivas”. Denunciou que no ámbito do ensino supoñen unha redución do 6,6% ou o que é o mesmo máis do 30% dos orzamentos dos de 2009”, un recorte que constrata “co apoio decidido á privada concertada á que se destinan máis de 240 millóns de euros”. Ante isto, afirmou con contundencia que “se non hai servizos públicos, non hai democracia, non hai xustiza social e só terán calidade de vida os ricos, algo ao que non estamos dispostos”.

No mesmo sentido, López Santamariña sinalaba que os Orzamentos galegos para 2013 afectarán ao funcionamento de servizos tan importantes como xustiza, universidades públicas, os servizos propios da Xunta ou os prestados polas administracións locais. Neste último caso veranse afectadas de forma directa e indirecta polos recortes de achegas económicas que facía a Xunta para a prestación de servizos como axuda no fogar ou emerxencias. “Uns servizos que están en moitos casos xa desaparecidos e noutros en vías de extinción, pero que con estes orzamentos desaparecerán totalmente”, advertiu.

Neste momento, puntualizou, tamén se atopan en conflito as universidades, xa que alén do recorte económico, comezou a transposición da Lei de Medidas Temporais en Determinadas Materias do Emprego Público. “Estase negociando en cada unha das tres universidades cos mesmos resultados que os obtidos para o propio persoal da Xunta e concellos: anúlanse convenios directamente e impóñense as modificacións de xeito unilateral”.

Aparte dos cambios nas condicións laborais e salariais, destacou Maricarme López, estes orzamentos son tan agresivos contra as universidades que suporán a desaparición de moitos dos servizos que estaba a prestar até agora (como bolsas de investigación) e non se descarta que por este motivo haxa regulacións de emprego e despedimentos.

“A maiores, a propia Xunta de Galiza aniquila os servizos propios que tería que prestar e en moitos casos xa nin agarda á aprobación definitiva dos orzamentos, senón que comezou a reorganizar aos seus efectivos, eliminando postos de traballos das RPTs, como xa fixo nos centros escolares cos servizos de comedores”, denuncia. 

Así, explica, neste momento comeza unha reestruturación da Consellaría de Traballo na que a administración fai unha proposta de amortización de case 300 postos de traballo, na que se inclúen prazas ocupadas por persoal fixo, que previsibelmente acomodarán noutros departamentos; mais tamén se amortizan outras prazas ocupadas por persoal laboral indefinido que será despedidos coas condicións impostas pola reforma laboral do, “co agravante que neste caso son 20 os postos afectados, porque se fosen 30 terían que presentar un ERE e seguir a tramitación legal correspondente”, matiza.

A respecto da destrución de emprego na administración, a voceira da Área Pública da CIG, expuxo o caso do complexo xuvenil das Mariñas no que se amortiza todo o persoal de comedor, parte de limpeza e de almacén, deixando os centros practicamente sen persoal para atendelo. “Estamos á espera de que o PP aclare que pretende facer con este complexo, pero sospeitamos que a intención final é dalo en concesión a empresas privadas amigas. O panorama que se nos presenta é moi escuro e as previsións de desaparición de servizos prestados directamente pola administración é enorme”, aseverou.

De igual xeito, a responsábel sindical indicou que a agresión destes orzamentos aos servizos públicos “é total”, pero aínda resultan máis agresivos coas condicións económicas e laborais do persoal que traballa na administración. “É sangrante que a Xunta impoña un recorte do 40% das pagas extras cando estas están contempladas integramente na lei de orzamentos do estado español”.

“Agardamos que o Goberno de Feijoo reflexione sobre a necesidade de garantir os servizos públicos, e que o conxunto da sociedade entenda que esta non é unha loita só dos traballadores e traballadoras das administracións na defensa das condicións laborais, senón que o que está en xogo é o mantemento dun servizos públicos de calidade para todos os galegos e galegas”, concluíu.

Coincidindo coa data de votación dos Orzamentos da Xunta para 2013, a Plataforma Galega en Defensa dos Servizos Públicos ten convocada unha nova concentración o vindeiro martes 26 de febreiro, dende ás 12:00 horas, ás portas do Pazo do Hórreo.