Ademais de animar a toda a comunidade educativa (alumnado menor de idade deberá ir acompañado por pai, nai ou titor/a legal) a participar nos peches que se van organizar en distintos centros de todo o país para, entre outras medidas, acordar novas accións reivindicativas, o martes 27 de xaneiro dan comezo os "martes en loita". Unha acción que pretende visibilizar no día a día dos colexios e institutos a necesidade de reducir ratios; de contar con máis persoal para atender a diversidade e con máis desdobres; de recuperar o horario lectivo; de reducir burocracia e de maior diálogo e negociación co profesorado. Para iso, ademais de vestir de negro tamén se pode elaborar cartelaría e outros materiais para empapelar os centros. Esta acción repetirase os tres martes antes do Entroido e o día 10 realizaranse concentracións en todos os centros de ensino portando mensaxes reivindicativas. Prégase que se compartan fotos e vídeos co correo galiza@cig-ensino.gal, ademais de nas redes sociais persoais e etiquetando ao sindicato.

Banda sonora das accións reivindicativas

O sindicato propón que se cante a versión da peza "O Galo" dos Campaneiros de Vilagarcía, que xa soou na manifestación do 17 de decembro diante de San Caetano. A peza pode ensaiarse durante os "martes en loita" e interpretarse o día 10 cando se celebren as concentracións nos centros como unha forma de homenaxe á nosa música tradicional, recoñecida o ano pasado polo Día das Letras e que, xunto co baile tradicional, veñen de seren declarados “Ben de Interese Cultural” pola Xunta. Mediante esta reivindicación tamén se estaría a esixir que o goberno galego se tome en serio o ensino público galego declarándoo “Ben de Interese XERAL" e dotándoo dos recursos necesarios para o seu bo funcionamento.

A CIG-Ensino considera que sería un acto de forte simbolismo cantar á vez desde todos os centros de ensino, como se di na peza, "conselleiro, rectifica, non estamos de farol, séntate a negociar ou continuamos coas mobilizacións... Esiximos a recuperación do noso horario lectivo, o recoñecemento da función docente, a redución das ratios, máis recursos para a atención á diversidade, a redución da carga burocrática e a mellora das nosas retribucións". Para iso pon a disposición do profesorado a partitura e a letra deste tema e agradece que se graven e envíen vídeos do momento no que se interprete para trasladarlle á Xunta de novo o sentir maioritario do profesorado.

Material para difusión dos "martes en loita"

CARTAZ

CARTACES CON FONDO BRANCO

CARTACES CON FONDO NEGRO

FAITE COA CAMISETA DE PROFESORADO EN LOITA

Contacta co teu local ou delegada sindical de referencia