As docentes galegas secundaron no día de hoxe a folga de mulleres cunha participación media superior ao 70%. Estes datos, provisionais e froito do estudo feito pola CIG-Ensino nos momentos previos ao paro das 12 horas, poderían ser mesmo superiores e demostran que a folga de mulleres está a ser un éxito total.

Nun sector altamente feminizado, as docentes galegas responderon cunha moi elevada participación na folga deste 8 de marzo, o que nos permite afirmar que a participación das mulleres do ensino está a ter un papel destacado neste 8 de marzo que xa podemos cualificar como unha xornada histórica, consolidando unha realidade imparábel. 

Desde a CIG-Ensino chamamos a participar masivamente nas concentracións e manifestacións que van ter lugar na tarde de hoxe para facer aínda máis visíbel que non hai marcha atrás na loita contra a discriminación das mulleres, da fenda salarial ou dos roles dun sistema patriarcal que mulleres e homes debemos combater para garantir a igualdade efectiva. 

O éxito da folga e das concentracións na mañá deste 8 de marzo, xunto coa participación que agardamos para esta tarde están a colocar a Galiza nun lugar destacado nas mobilizacións deste 8 de marzo.

En palabras da secretaria confederal de Mulleres da CIG, Margarida Corral "As galegas estamos demostrando a nosa capacidade de mobilización, a través da que somos quen de situar Galiza no mapa mundial do Paro Internacional de Mulleres e participar activamente nunha xornada histórica, revolucionaria, que marca un punto de inflexión na conmemoración do 8 de Marzo e en como temos que concibir a celebración desta data!".

Seguiremos!!