Esta mañá tivo lugar a primeira reunión da comisión de negociación do Plan de Igualdade, constituída no mes de xuño. Durante a mesma, confirmouse por parte da administración que os datos económicos para a análise corresponderían aos do ano natural 2024 e que por coherencia todos os demais datos estatísticos estarían extraídos a data 31 de decembro de 2024. Esta información contradí ao que hai meses se nos trasladou, a intención de tomar como referencia o curso escolar 23-24, próximo a rematar naquel momento.

Este cambio vén a demostrar varias cousas:

• A Consellería de Educación non fixera unha valoración axustada á realidade en canto a súa capacidade para facilitar os datos ata agora, finais de novembro.
• Enviáronsenos unha serie de datos estes últimos meses, moi parciais e incompletos como xa denunciamos, máis que só servían para simular que estaban a facer algo, xa que non van ser utilizados para o plan.
• Trasladóusenos unha información falsa cando na mesa sectorial do pasado 12 de novembro se comprometeron a incrementar o ritmo e falaron de ter dúas reunións no que quedaba de ano. Na primeira, a de hoxe, debateuse cales eran os datos precisos para facer unha correcta diagnose da situación e sabemos que non imos ter outra ata telos, como moi pronto a finais do mes de xaneiro.

En definitiva, terá transcorrido máis da metade do tempo destinado por lei para negocialo e aprobalo sen iniciar sequera o primeiro paso, os traballos de análise dos datos.