Hoxe, a partir das 18:30 horas, levaranse a cabo peches na galescola do polígono do Tambre (Santiago), na Escola Infantil de Burela (Rúa dos Torques, Burela) e no centro de día de Monforte (Rúa Ricardo Quiroga).

Estas mobilizacións enmárcanse na loita que máis de 1500 traballadoras/as están levando a cabo para que se lles aplique o V Convenio do persoal laboral da Xunta de Galiza, en contra da privatización e en defensa do posto de traballo. Continuarán o día o día 6 na Coruña, o 7 en Ourense, o 8 en Vigo e o 9 en Pontevedra e Ferrol.

Malia que o propio Consorcio depende da Consellaría de Traballo e Benestar, non teñen convenio colectivo e están moi lonxe de ter as mesmas condicións de traballo e salario que ten o persoal laboral da Xunta de Galiza da mesma categoría e profesión. O persoal do Consorcio percibe uns salarios reducidos nun terzo, aproximadamente, respecto á dos seus homólogos da Xunta.

A consellaría de Traballo e Benestar vén de iniciar o camiño da privatización dos servizos que presta o Consorcio. Así, a día de hoxe, xa hai cinco “Galiñas azuis” privatizadas e igual sorte correrán as próximas 12 “Galiñas azuis” que se van abrir para o vindeiro curso. Mais, a súa ambición privatizadora pretende continuar, despois, coas escolas infantís que hoxe están funcionando como públicas.

Diante desta situación de total abandono e desconsideración, por parte do xerente do Consorcio e da propia consellaría de Traballo e Benestar, referente á estabilidade do colectivo, ás condicións de traballo e a aposta polo desmantelamento do carácter público do Consorcio, iniciamos hoxe diferentes peches que se prolongarán até o día 10 de marzo e exiximos que se inicie un proceso negociador para aplicar a todo o persoal do Consorcio o V Convenio único do persoal laboral da Xunta de Galiza, para que todos os centros dependentes do Consorcio sexan de xestión pública e que se garanta a estabilidade dos traballadoras/es.