As organizacións sindicais do ensino público, reunidas esta mañá para valorar o Real Decreto-Lei 14/2012, adoptaron os seguintes acordos: Denunciar publicamente que as medidas recollidas no RD Lei 14/2012 de 20 de abril de medidas urxentes de racionalización do gasto público no ámbito educativo supoñen unha grave invasión das competencias que lle corresponden á Consellaría de Educación. Por este motivo, acordamos esixir do Conselleiro de Educación que recorra ante os tribunais o RD Lei.

Denunciar que o ensino público galego sufriu até o de agora reiterados recortes que se traduciron na perda de profesorado, empeoramento das condicións laborais e redución da dotación dos centros.  Esiximos, por tanto, que a Consellaría de Educación non aplique en ningún caso, ningunha das medidas recollidas no RD Lei.

 Para reclamar da Consellaría que recorra e non aplique o RD Lei, as organizacións sindicais asinantes acordamos realizar as seguintes mobilizacións:

 Concentración das e dos delegados sindicais ante a Consellaría de Educación o día 2 de maio, ás 11:30 horas, en defensa do ensino público e contra os recortes en Educación.

Promover propostas de resolucións das Xuntas de Persoal e dos claustros de profesorado esixindo que a Consellaría de Educación non aplique estas medidas.

 As organizacións sindicais do ensino anuncian que, de ser preciso, convocarán o profesorado ás mobilizacións necesarias en contra dos recortes e en defensa do ensino público.

 CIG-ENSINO                       CCOO-ENSINO          FETE-UGT              ANPE             STEG    CSI-F

Santiago, 24 de abril de 2012