A adxudicación definitiva das axudas aos Equipos de Normalización Lingüística confirma a denuncia que fixo a CIG-Ensino no mes xaneiro de que as axudas para os Equipos de Normalización Lingüística para este ano 2012 sofren unha redución orzamentaria do 69% respecto da convocatoria dos cursos 2009-2010 e 2010-2011 e do 75% respecto do curso 2008-2009. Para este curso, o orzamento total da actividade será de 250.000€, 550.000€ menos ca nas convocatorias dos dous cursos anteriores e 750.000 € menos ca nas partidas asignadas antes da chegada do PP á Xunta.

Para a CIG-Ensino a convocatoria para o curso 2011-2012 é a peor das publicadas até hoxe, polo drástico recorte, pero tamén polo atraso excesivo e premeditado na convocatoria –é o curso no que máis tarde se realizou- e porque impide a realización de actividades no primeiro trimestre, setembro 2011-decembro 2011, xa que a convocatoria sinala taxativamente que só se aceptarán facturas do ano 2012, até o 30 de xuño.

 A estes feitos súmase agora que os centros acaban de coñecer, once días antes de que remate o prazo de xustificación dos gastos realizados, se finalmente se lles concede ou non axuda, e a contía da mesma. A CIG-Ensino xa denunciara que o recorte na convocatoria tería consecuencias extremadamente negativas, como agora se confirma definitivamente:

 

	Centros aos que se lles concede axuda para o ano 2012	Diferenza de centros que non perciben axuda respecto do curso anterior	Contía total da axuda	contía media
A Coruña	337	-20	89413,48	265,32
Lugo	125	-5	31708	253,66
Ourense	117	0	26927	230,15
Pontevedra	328	-17	101136,92	308,34
Total Galiza	907	-42	249185,4	274,74

-       Redución significativa do número de centros que se poderán beneficiar destas axudas

-       Redución da dotación media por centro que o ano pasado era duns 853€, mentres que este ano é de  274 €, por tanto uns 579€ menos por centro.

-       Prexuízos económicos aos centros que programaron e realizaron actividades de normalización no primeiro trimestre, como todos os cursos, xa que este ano non o poderán incluír na xustificación da axuda.

Con esta resolución queda probada a denuncia da CIG-Ensino, feita no mes de xaneiro e reiterada ao coñecerse os datos da resolución provisional. Unha vez máis é a normalización do noso idioma a que sofre os maiores recortes, proba inequívoca de que esta Consellaría de Educación ten un obxectivo claro: procurar a desaparición do noso idioma nos centros educativos e, por extensión, na sociedade galega.