Pasado por auga, pero coa mesma intensidade que no resto de vilas, o Correlingua tivo lugar esta mañá en Narón coa presenza de 1.500 alumnos e alumnas dos centros CEIP PIÑEIROS, CEIP A  SOLAINA, CEIP VIRXE DO MAR E CRA DE NARÓN, do concello de Narón; CEIP RECIMIL, CEIP A LAXE, CEIP ISAAC PERAL, CEE TERRA DE FERROL, do concello de Ferrol; CEIP OS CASAIS e CEIP CENTIEIRAS, do concello de Fene; e do concello de Neda os centros CEIP SAN ISIDRO e CEIP MACIÑEIRA.

A defensa do galego non se veu afectada pola climatoloxía. Os 1.500 estudantes de 12 centros da comarca ferrolá que estaban inscritos para o Correlingua ateigaron até en dúas sesións o Pazo da Cultura de Narón debido a que non puido celebrarse a tradicional marcha reivindicativa en defensa do galego. Nun acto dobre presentado pola actriz Isabel Risco e animado por Paco Nogueiras os rapaces e rapazas procedentes de centros de Narón, Ferrol, Fene e Neda gozaron da festa que estaba prevista para despois da carreira.

Na CIG-Ensino agradecemos que malia o vento, a chuvia e o frío a implicación de alumnado e profesorado non se vira mermada en absoluto na que é xa unha actividade de referencia na comarca no mes de celebración das nosas Letras.