Esta mañá celebrouse a primeira convocatoria da comisión de licenzas non retribuídas e a Consellaría non deu resposta ás peticións existentes, malia que non lle supón ningún custe á marxe da cotización dese profesorado, por ser superiores ao número de prazas ofertadas. A CIG-Ensino anima as persoas afectadas a presentar recurso contra esta denegación.

En pleno mes de agosto, o departamento que dirixe Román Rodríguez sorprendeu coa publicación dunha convocatoria na que se ofertaba un número de meses, 96 concretamente, para as licenzas por formación non retribuídas para o curso 25/26. Este dato omitiuse no momento de negociar a convocatoria na mesa sectorial correspondente, polo que a CIG-Ensino non puido demandar maior número de prazas. Era evidente que a eliminación de licenzas retribuídas por formación daba pé a pensar que se incrementarían considerablemente o número de peticións das non retribuídas, como así foi. Se na anterior convocatoria se rexistraron oito peticións, nesta foron vinte e tres.

Non contenta con decidir sen consultar coa representación do profesorado, a Consellería é quen de abraiarnos aínda máis ao indicar na comisión de selección, á que asistimos con voz e sen voto, que incrementa pola súa conta e por riba do que estabelece a convocatoria o número de meses para conceder todas a solicitudes da “modalidade A”, dirixida a persoas que cumpren co requisito de seren funcionarias de carreira e non ter desfrutado previamente dunha licenza por formación. Porén, as persoas que non forman parte dese grupo (que tiveron licenza previa, funcionarias en prácticas ou interinas) quedan en “reserva” ou á espera de que se dean renuncias dentro do primeiro grupo, é dicir: sen praza, inicialmente. Para ordenar este grupo de persoas sen praza, a Consellería establece un baremo que, segundo indica na comisión, xa se empregou noutras convocatorias pero que non aparece en absoluto na presente. Como advertiu a CIG-Ensino na comisión, isto supón que pode haber persoas que non presentaran os seus méritos porque en ningún momento se lle requiriron na convocatoria. Ante as protestas do sindicato maioritario, a Consellería recuou en parte para anunciar finalmente que aplicará como criterio de desempate só a antigüidade das concursantes, criterio, en calquera caso, inexistente na convocatoria.

Cómpre dicir que o mal chamado “Pacto de melloras” incluía un apartado referido explicitamente á regulación de licencias de formación non retribuídas a partir do ano 2024. Constatamos que esta regulación, que coincidiu curiosa e simultaneamente coaa eliminación das licenzas retribuídas, significa unha contía económica “ridícula”. Non en van, na comisión de selección a Consellería comezou por delatarse, fiel á súa política de recortes que cae na pura mesquindade, ao dicir que as licenzas non retribuídas si supoñían un gasto para a administración, que se ten que facer cargo da cotización á seguridade social das persoas ás que se lles concede. En todo caso, é evidente que ese exiguo gasto non é comparable co que suporía a convocatoria de licenzas retribuídas que é un dereito que con diversas modalidades, desde o ano sabático até os exiguos 3 meses para a creación de materiais, sempre tivo o profesorado galego; nin as miserábeis migallas do pacto de melloras se lle dan ao profesorado.

En conclusión, nin mesa sectorial, nin DOG, a Consellería decide e aplica as súas decisións segundo lle conveña e para maior descaro quere contar co aval da parte sindical. Supoñemos que quen asinou o pacto de “melloras” poderá darllo, non así a CIG-Ensino que nin asinou un acordo que se demostra papel mollado, nin acepta, como o comunicou na comisión de selección, os “chanchullos” que redundan finalmente no constante recorte de dereitos do profesorado. Como non podía ser doutro xeito, a Consellería ten á CIG-Ensino de fronte e convida as persoas excluídas a interpoñer o correspondente recurso.