No día de onte, 6 de outubro, a Xunta de Persoal da Coruña (máximo órgano de representación do profesorado do ensino público na provincia), aprobou por unanimidade solicitar o cese do Xefe Territorial de Educación, Indalecio Cabana, e que se abra a corresponde investigación sobre a actuación da inspectora do centro, Berta Estrada Arias, no referido ás presuntas coaccións sobre a directora do CEIP Luís Seoane de Mera- Oleiros.

A CIG-Ensino considera que unha persoa cun comportamento tan impresentábel e caciquil como o que vén de amosar o Xefe Territorial da Coruña non pode estar á fronte, como cargo político, dun posto de representación. A central entende que coa dimisión forzada da directora o que se pretende é desviar a atención das responsabilidades que lle corresponden á administración, por ser quen contrata as empresas de transporte.

A CIG-Ensino, así como todos os demais sindicatos con representación na Xunta de Persoal da Coruña, consideran moi grave que o Xefe Territorial recorrera a unha acusación de “perda de confianza” cando resulta totalmente inadecuada "porque un cargo directivo ten que merecer a confianza dos órganos de goberno dos centros, claustro e consello escolar, non de cargos políticos".

Para a Xunta de Persoal, detrás deste subterfuxio está a evidencia da falta de motivos para proceder a un cesamento da directora, "algo que se evidencia tamén en que o Xefe Territorial utilizou a inspectora do centro para trasladar esa “orde de que presente a dimisión”, sen pedir nin permitir explicación dos feitos, mostrando unha vez máis o seu talante absolutamente autoritario.

A continuación reproducimos literalmente o texto aprobado.