Tal e como avanzou en decembro de 2018, a Xunta non só non ten ningún reparo en que a entidade privada que quedou coa principal entidade bancaria galega a prezo de saldo abra unha universidade privada no noso país senón que o fai con todo o apoio e decisión.

Desde a CIG-Ensino insistimos en que o que precisa o sistema educativo galego e, en concreto, a oferta de estudos universitarios non é a entrada de entidades lucrativas no negocio das ensinanzas superiores senón o reforzo orzamentario destinado ás tres universidades públicas galegas rematando coas limitacións impostas polo goberno galego e permitindo a ampliación da oferta educativa coas necesarias adaptacións ás necesidades e ás potencialidades sociais e laborais do país.

Mais a Xunta de Galiza segue a limitar a posta en marcha de novas titulacións, atando ao SUG cunha cláusula de estabilidade que é máis ben un dique de contención ao crecemento e innovación na rede pública, con consecuencias na precariedade laboral e na inestabilidade dos cadros de persoal docente e investigador.

Ás políticas que impediron nestes últimos anos o medre de matrícula no SUG haberá que engadirlle, cando se poña en marcha a oferta da universidade de Abanca, que centrará o seu nicho de mercado en Santiago, A Coruña e Vigo, os efectos que poida producir esta nova entidade privada nas titulacións que actualmente ofertan a USC, UDC e UVigo, mentres que desde a Xunta de Galiza se está a requirir ás Universidades do SUG que unifiquen ou diferencien aquelas titulacións que neste momento están mais que duplicadas, aínda que exista demanda para todas elas. O que se coñece dos planos da Universidade de Abanca é que se dirixe claramente cara estas titulacións que a Xunta pretende reducir no Sistema Público. Por iso, non parece lóxico que se autoricen estas titulacións a unha universidade privada

A CIG-Ensino reafirma o seu total rexeitamento á creación desta ou calquera outra universidade privada ao entendermos que sería nefasta para os intereses do sistema universitario público galego e esixe ao goberno galego o cumprimento das esixencias para a posta en funcionamento desta universidade, desde restrinxir a duplicidade de titulacións, tanto de grao como de mestrados, aos requisitos de cualificación do potencial profesorado.