A Xunta aproveita a pandemia da COVID-19 para intentar liquidar as universidades públicas galegas

Comunicado da CIG-Ensino ao “Programa de Transformación” para as universidades galegas promovido pola Xunta de Galiza

Cunha présa inusitada para un goberno autonómico que sempre desatende as necesidades das universidades, a Xunta pisa o acelerador encargándolle á Fundación Empresa Universidade (FEUGA) e a unha consultora externa un proceso masivo de liquidación dos títulos presenciais coa finalidade de que no curso 2021-2022 a maioría deles sexan semipresenciais,  impartíndose toda a docencia teórica online. Xa en setembro de 2020 pretende obrigar a que moitas titulacións fagan ensaios para ese cambio, alterando a organización dos cuadrimestres, concentrando a docencia, coartando as vías de avaliación posíbeis e suprimindo a docencia presencial teórica.

O borrador deste “Programa de Transformación” ao que tivo acceso a CIG-ENSINO é todo un cúmulo de despropósitos, disfrazando de pseudo-innovador o que en realidade é un auténtico plan de desmantelamento do sistema universitario público de calidade. Un plan feito, ademais, con nocturnidade e aleivosía, aproveitando a situación de estrés e de anestesia social derivados do actual estado de alarma. A redacción do documento en si é un insulto á intelixencia das galegas e galegos, recollendo propostas carentes da máis mínima base e xustificación, froito dun oportunismo improvisado, rastreiro e desleal con toda a sociedade galega. 

Desvirtuar o carácter presencial das nosas institucións, destruíndo a relación entre os docentes e os estudantes e a vida universitaria entre o estudantado é só o primeiro paso. En liña co proceso de posta en marcha da primeira universidade privada en Galicia, a Xunta busca restar espazo ás universidades públicas, desfigurándoas e facendo que perdan a súa esencia como espazo de produción e intercambio de coñecemento, ideas e vivencias; como referentes da investigación, a innovación e como alicerce do progreso e avance dun país. O seguinte paso será prescindir dunha boa parte do profesorado e substituílo por colaboradores docentes altamente precarizados e sen conexión coa misión investigadora, como sucede nas universidades a distancia existentes.

A CIG-ENSINO considera que é gravísimo que se usen os efectos desta pandemia como desculpa para dar un golpe de man que poña en risco unha das principais funcións das universidades galegas, -e como consecuencia o seu profesorado-: a xeración e a transmisión de coñecemento, e a formación de cidadáns con capacidade para interpretar e dar resposta aos retos tan complexos que ten por diante o noso pais.  

CIG-ENSINO chama ás tres institucións universitarias galegas a dar resposta a esta estratexia da Xunta e esixe a paralización deste disparate.

Volver