A Unidade de atención a centros (UAC) da Consellaría non atendeu durante os últimos días de xuño as chamadas que se realizaban desde as direccións dos centros, e segundo nos comunican desde diversos centros, pasados estes días e unha vez establecida comunicación co persoal da UAC, comentaron que tiñan orde de non atender as chamadas dos centros por estar en mínimos de persoal e estar a realizar outras funcións.

A finais de cada curso, nos centros educativos, os trámites administrativos con prazos fixados de entrega de documentación multiplícanse: actas de avaliación, envío de documentación variada en soporte electrónico (Plambe, Club de Lectura, Normalización,…) co que calquera mínima incidencia como falta de conexión a internet, fallos técnicos no xade, ... xera enormes complicacións aos equipos directivos e ao profesorado en xeral, máis aínda se desde o servizo de atención que presta a Consellaría non funciona como tal.

Non é admisible que a Consellaría non preste un servizo fundamental como este por falta de persoal e mesmamente dando instrucións de non atender telefonicamente as chamadas.

Desde a CIG Ensino demandamos da Consellaría dote á UAC do persoal necesario para atender de forma correcta aos centros en todo momento.