A inauguración do curso universitario na Coruña acolleu unha nova concentración contra os recortes
Anxo Louzao advirte da “covardía” de Feijóo que finalmente non asistiu ao acto
Anxo Louzao referiuse tamén á “covardía” do presidente da Xunta de Galiza, que finalmente non acudiu ao acto no que si estivo o conselleiro de Educación, Jesús Vázquez. “Non é capaz de enfrontarse a unha situación como esta, na que a cidadanía amosa o rexeitamento a súa política”, dixo.
“Medidas como a suba das taxas universitarias, con prezos desorbitados, ou a redución das bolsas provocarán que o acceso aos estudos universitarios para as clases populares e familias con menos recursos sexa case que imposible nun futuro inmediato”, engadiu Anxo Louzao.
Para a CIG-Ensino, nestes tres anos de Goberno, o PP amosou que o seu obxectivo é reforzar o ensino público concertado en detrimento do público, no que se suprimen unidades e profesorado, ata 2.500 na Lexislatura. No acto, Anxo Louzao lembrou que para este curso 2012-2013 os centros contará ademais con menos recursos e aulas masificadas que irán en detrimento da calidade.
As protestas contra os recortes continuarán o próximo luns 10 de setembro ás 11:00 horas, diante da Consellaría de Educación, en San Caetano, para denunciar a destrución de emprego público e a redución de dereitos laborais que afectan de xeito especial ao profesorado interino e substituto.