A día de hoxe, 10 de decembro, cando está a piques de rematar o primeiro trimestre de curso, a Consellaría de Educación continúa sen facer efectivo aos centros educativos o pago do gasto dos comedores de xestión directa correspondente ao meses de setembro, outubro, novembro e decembro.

Cabe sinalar que este é un problema que xa xurdiu en cursos anteriores e que en lugar de quedar solucionado agrávase. Aínda así o curso pasado o pago fíxose no mes de novembro. 

Á Consellería non lle chega con incrementar os prezos de maneira desorbitada polo uso do comedor e reducir o número de comensais con dereito á gratuidade, senón que tamén amosa unha desidia absoluta en relación ao seu funcionamento.

A CIG-Ensino esíxelle á Consellaría de Educación o que faga inmediatamente o ingreso económico aos centros que prestan servizo de comedor escolar, xa que parte deles están debendo cartos aos provedores e outros, se nesta semana non se lles ingresa, estarán en números “roxos”. A CIG-Ensino  demanda que se tomen as medidas necesarios para que os pagos se fagan co inicio do curso.

Esta é unha mostra máis da política da Consellaría de Educación de recortes permanentes e de redución e empeoramento dos servizos complementarios, básicos nun momento de crise  como o actual para garantir a igualdade de oportunidades e a gratuidade da educación en Galiza.