Na orde do día do pleno do Consello Escolar de Galiza do 29 de setembro contemplábase a aprobación do Ditame sobre o proxecto de decreto polo que se regula a planificación, estrutura, organización e funcionamento da formación permanente do profesorado dos centros educativos de Galiza públicos e privados concertados. A discusión do ditame provisorio iniciouse coa presentación das emendas á totalidade, entre elas unha da CIG-Ensino, en que se pedía a retirada do Decreto. As razóns da dita petición eran a ausencia de debate e participación do profesorado na súa elaboración, a involución que representa nas funcións, obxectivos e estrutura da formación do profesorado e a xerarquización e centralización que supón o novo modelo proposto, que mesmo abre a porta á posible privatización. Ao final non houbo ditame por non alcanzar os votos necesarios.