O próximo xoves día 10 está convocada a Mesa Sectorial de Ensino non universitario. Na orde do día figura como primeiro punto a oferta pública de emprego. A CIG-ENSINO veu reclamando desde decembro a convocatoria desta mesa, pois consideramos que cumpría negociar o máis axiña posíbel a oferta de emprego público e as prazas que se van convocar.

CIG-ENSINO vai esixir na Mesa Sectorial que se convoquen todas as prazas que se xeneren por xubilación, dando cumprimento ao recollido na Lei de Orzamentos da Xunta de Galiza que recolle que, no caso da Consellaría de Educación, se poderán cubrir todas as vacantes xeradas por xubilación anticipada.

Neste sentido, consideramos que as xubilacións previstas, pendentes de seren confirmadas a 31 de marzo e a falta de que a Consellaría publicite os datos, poden acehgarse ás mil entre Primaria e Secundaria.

A CIG-Ensino vai esixir tamén que se convoque oferta tanto en Primaria como en Secundaria. Neste sentido cabe lembrar que nos cinco anos deste modelo transitorio de convocatoria, todos os anos se convocaron oposicións en Primaria, mentres que en Secundaria, xa no ano 2009, non houbo oferta (ao final da nota figuran os cadros coa oferta dos anos anteriores).

A CIG-Ensino tamén esixirá que unha parte da proba de acceso, como mínimo, se realice en lingua galega, como mellor forma de garantir que o profesorado que acceda á función pública en Galiza reúna a formación necesaria para cumprir o establecido en materia lingüística, nomeadamente a Lei de Normalización Lingüística. Tamén porque o coñecemento do noso idioma debe ser un requisito básico para todas as traballadoras e os traballadores da Adminsitración pública galega.

ANEXO:

Oferta de emprego por corpos entre 2007-2010:

Corpos	Prazas ofertadas
Profesorado de Secundaria	1683
Profesorado de FP	317
Profesorado técnico de FP	238
Escolas Oficiais de Idiomas	61
Profesorado de Conservatorios	216
Profesorado de Artes plásticas e Deseño	16
Total de prazas de Secundaria	2531
Total de prazas de Primaria	3618
TOTAL PRAZAS	6149

 Prazas convocadas cada ano en Secundaria:

Ano	Prazas ofertadas
2007	1179
2008	983
2009	0
2010	369

Pazas convocadas cada ano en Primaria:

Ano	Prazas ofertadas
2007	1350
2008	928
2009	740
2010	600