O Consello Federal da CIG-Ensino avaliou esta mañá os principais problemas aos que se enfronta o colectivo docente no arranque de curso, entre os que destacan o incumprimento de ratios, a ausencia de docentes especialistas e o incremento de materias afíns, a sobrecarga de traballos burocráticos en detrimento do labor docente, problemas coas itinerancias entre centros e co transporte escolar combinado…

En palabras do seu novo secretario nacional, Suso Bermello, “a improvisación da Consellería, ademais de teimar na política de recortes de dereitos do profesorado, deriva nun inicio caótico de curso que se ve agravado polo importante número de docentes que teñen que impartir materias afíns das que non son especialistas, arredor de 1.270, o que supón case o 30% do total de prazas adxudicadas na ESO, FP, EOI e nas ensinanzas de réxime especial”. “Como todos os anos, os centros póñense a funcionar grazas á profesionalidade e ao esforzo dos seus cadros de persoal –engade Bermello- que teñen que lidiar con dificultades para fixar horarios; con aulas masificadas que impiden unha atención máis personalizada e tarefas de reforzo educativo; cun aumento da carga burocrática en detrimento do labor propiamente docente, con problemas para ver recoñecida a situación de itinerancia cando se traballa en máis de dous centros á vez, nomeadamente nas seccións das Escolas Oficiais de Idiomas, así como novos retos derivados da xestión do transporte combinado, que está por ver se implica un aumento ou non no tempo de transporte do alumnado e unha modificación dos horarios lectivos”.

Neste sentido, a CIG-Ensino xa lle advertiu á Consellería que a incorporación de viaxeiros particulares nas rutas de transporte escolar non pode afectarlle, baixo ningunha circunstancia, aos seus principais usuarios, os nenos e nenas que teñen que seguir chegando no seu horario habitual aos centros e sen que se vexan modificados nin o percorrido nin o tempo de viaxe dos autobuses. Polo demais, no Consello Federal tamén se informou doutras xestións realizadas pola CIG-Ensino a comezos deste curso e relativas á necesidade de que a Consellería aposte decididamente polas Escolas de Arte de Galiza e polas ensinanzas que nelas se imparten, que están sendo discriminadas fronte aos estudos universitarios ou de formación profesional aos que, na práctica, son equivalentes. Outro dos problemas que se detectou este mes foron as instrucións contraditorias que se estaban a dar desde a inspección educativa con respecto ao caso de funcionarias que lles coincide a fase de prácticas, tras tres aprobado o concurso oposición, co embarazo ou o permiso por parto. Neste sentido, o sindicato esixiulle á Consellería claridade nas comunicacións e unha flexibilización que permita que este colectivo poida rematar esta fase e obter, se é posíbel, destino definitivo o vindeiro curso académico, ao igual que o resto de funcionariado en prácticas. E, por último, tamén se deu parte do escrito presentado en San Caetano para obter a relación actualizada de Centros de Especial Dificultade e a súa publicación nunha nova Orde que os regule para parte do profesorado que traballa neste tipo de centros non se vexa discriminado no próximo Concurso Xeral de Traslados e que poida obter os dous puntos que lle corresponden por servizos prestados.

Desde o Consello Federal tamén se aproveitou para pór en valor o traballo sindical que se está a realizar tanto de axuda e asesoramento á afiliación como de continua defensa dos intereses do profesorado fronte a unha administración que segue desoendo as reclamacións de restitución dos dereitos perdidos nos últimos anos.