Do 10 ao 13 do presente mes o Foro Mundial da Educación celebrará en Compostela un Encontro Internacional no que participarán entidades e persoas relacionadas coa educación procedentes de todo o mundo. Encontro no que neste momento xa hai inscritas preto de 1000 persoas e no que se reflexionará sobre a educación, a súa situación actual e as perspectivas de futuro, nun momento no que baixo a escusa da actual crise económica os gobernos occidentais atacan este servizo público básico.

A CIG-Ensino, que forma parte do Comité Organizador e do Comité Operativo do Encontro leva varios meses traballando co obxectivo de que a realidade de Galiza como nación e a loita que se está a dar na defensa do ensino público e dos nosos sinais de identidade, nomeadamente o idioma, fronte á política da Xunta de Galiza estean presentes no mesmo, e poidan ser coñecidas polas entidades e especialistas de outros países que asistan.

 

A CIG-ENSINO  organiza conxuntamente coa Fundación Galiza Sempre dúas mesas, que se desenvolverán na Facultade de Ciencias da Educación.

 

-      O sábado día 11 ás 11h. da mañá: Vivirmos na propia lingua: un dereito dos pobos coa intervención de diversos especialistas,e integrantes de plataformas, entre os que está o secretario nacional do noso sindicato, Anxo Louzao,  que traballan na defensa do nosos idioma.

-      O luns día 13 ás 11h. da mañá: Paz e dereitos colectivos dos pobos coa intervención de analistas de política internacional e a presenza dun representante do pobo kurdo.

 

Xunto con estas Mesas a CIG-ENSINO como parte do Comité Organizador integrará un dos Plenarios Centrais do Foro, concretamente o que se celebrará o día 10 ás 11:30h. no Auditorio de Galiza.