A CIG-Ensino solidarízase co profesorado e co equipo directivo do Conservatorio de Música de Santiago de Compostela, que con data de 16 de xuño de 2011 presentou a súa dimisión ante a Xefatura Territorial da Consellaría de Educación.

Esta dimisión é unha proba máis da política de supresión e a abandono de funcións da Consellaría de Educación. Tanto o propio equipo directivo do CMUS como a CIG-Ensino ten denunciado en repetidas ocasións a falta de recursos materiais e humanos nun centro masificado (concebido para 300 alumnos/as e actualmente cunha matrícula de 500). Unha das necesidades máis urxentes do centro nos últimos anos é o reforzo de persoal non docente, administrativo e conserxería, ao que a Consellaría deu a calada por resposta, amosando o seu máis absoluto desprezo ante as demandas máis básicas do profesorado. A CIG-Ensino esixiu reiteradamente a cobertura dunha praza máis de conserxe e así o demandou na mesa sectorial e ante a Xefa Territorial. O próximo mércores 22 de xuño, na reunión que manteremos coa Xefa Territorial, volveremos a reclamar a dotación dun novo conserxe e a ampliación do conservatorio para satisfacer a demanda existente.

Para a CIG-Ensino é preocupante que os equipos directivos se vexan obrigados a presentar a súa dimisión ante o desprezo da autoridade educativa polas demandas mínimas para o bo funcionamento do servizo.