As eleccións sindicais reforzan a CIG-Ensino como a organización amplamente maioritaria do ensino grazas ao apoio do profesorado galego. A CIG-Ensino, co 100% de votos escrutados. Consegue 62 delegados/as sindicais, 9 máis que nas anteriores eleccións, o que supón acadar máis do 43% de representación. A CIG-Ensino quere agradecer publicamente a confianza e o apoio, moi maioritario, que, unha vez máis, o profesorado galego nos vén de outorgar, xa que significa un recoñecemento explícito ao traballo desenvolvido durante estes anos e unha adhesión ás reivindicacións e propostas defendidas pola CIG-Ensino, así como un aval ao único modelo sindical galego, participativo e próximo ao profesorado que aposta por un ensino público galego, democrático, laico e coeducativo.

O Sr. Conselleiro de Educación debe tomar boa nota do apoio maioritario do profesorado á CIG-Ensino que significa unha reprobación á política educativa da Consellaría, fundamentada na aposta polo ensino privado concertado en detrimento do público, na desconsideración e recorte de profesorado nos centros e no ataque permanente do noso idioma e unha actitude autoritaria e antinegociadora da Consellaría de Educación.

O apoio á CIG-Ensino é a aposta por un sistema educativo galego, baseado na equidade e igualdade de oportunidades, na prevención do fracaso escolar e na revalorización da función pública docente e o rexeitamento ao decreto 79/ 2009 de plurilingüismo no ensino e no restabelecemento do consenso acadado no plano xeral de normalización. 

A CIG-Ensino exixirá a apertura de negociacións para acadar unha lei galega de educación, un estatuto do profesorado galego, maiores orzamentos para o ensino público, o restabelecemento dos nosos salarios e das pagas extras, a consecución do dereito indefinido a nos poder xubilar anticipadamente, a redución do número de alumnos/as por aula, o restabelecemento da xornada reducida de xuño e setembro, a redución horaria aos maiores de 55 anos, amplas ofertas públicas de emprego, a dotación de profesorado suficiente nos centros, a dotación de administrativos/as en todos os centros e a estabilidade do profesorado interino, etc.

Resultados Electorais

	CIG		ANPE		CCOO		UGT		CSIF		STEG
	VOTOS	DEL.	VOTOS	DEL.	VOTOS	DELE.	VOTOS	DEL.	VOTOS	DEL.	VOTOS	DEL.
CORUÑA	3.628	23	778	5	1.322	9	745	5	385	0	805	5
LUGO	1.030	10	535	5	255	2	530	5	360	4	286	3
OURENSE	703	8	449	5	715	8	321	4	54	0	202	2
PONTEVEDRA	3.426	21	510	3	1.051	7	1.213	8	197	0	699	4
TOTAL	8.787	62	2.272	18	3.343	26	2.809	22	996	4	1.992	14