É inaceptábel que, ao servizo da propaganda, dedique os seus esforzos a saír nos medios de comunicación difundindo unha imaxe falsa da verdadeira implicación do seu departamento e a Consellaría de Educación, á que pertence, con profesorado que día a día traballa pola normalización do noso idioma.

Inaugura unha exposición de 20 anos de Equipos de Normalización Lingüística comezando por ocultar o nome que estes equipos tiveron durante 19 deses 20 anos: Equipos de Normalización, unha palabra que grazas ao actual Secretario Xeral, entre outros, foi desterrada do Decreto que regula o uso da lingua galega, se cadra coa intención de ocultar a situación real do noso idioma. O Secretario Xeral inviste o  diñeiro do seu departamento nun acto propagandístico a maior gloria da súa propia persoa, dotándose dun altofalante desde o que di que “a celebración dos 20 anos dos equipos lle permite á secretaría xeral amosarlles o seu apoio aos equipos de toda Galicia, que constitúen unha rede dinamizadora que incide constante e eficazmente sobre un conxunto amplo de poboación e que realizan un traballo fundamental na educación da futura cidadanía galega.” Tarde piaches, Anxo Lorenzo, porque levas moito tempo demostrando xustamente o contrario, que os Equipos de Normalización non contan co apoio da Secretaría Xeral de Política Lingüística. E para demostración lembramos todos os incumprimentos dese departamento a día de hoxe:

• A piques de rematar o primeiro trimestre do curso 2011-2012, os equipos aínda non percibiron a totalidade dos ingresos que lles correspondían polas actividades realizadas no curso anterior, 2010-2011.
• Neste momento, tampouco se convocaron aínda as axudas para este curso, un atraso inxustificábel e que inviabiliza a realización de actividades de promoción da nosa lingua até moi avanzado o curso escolar.

Señor Secretario Xeral, se de verdade quere apoiar os equipos, comece por regularizar o pago das axudas e non deixe de saír publicamente na súa defensa cada vez que son atacados, algo que, sucedeu, infelizmente, co concurso do Valedor do Pobo e o propio Conselleiro de Educación. 

Para finalizar, a CIG-Ensino manifesta a súa desconformidade coa imaxe que pretende difundir e potenciar dos Equipos de Normalización, unha imaxe que pretende reducilos a departamentos de actividades culturais en galego, o que, se ben forma parte da súa actividade, non é a súa única función.