A CIG Ensino participa desde a semana pasada nas concentracións que están levando a cabo as nais e pais do CEIP de Vite e ás que se suman nesta semana as mestras e mestres do centro.

Estas concentracións realizaranse todas as mañás un pouco antes da hora de entrada (9:30 horas) até conseguir a dotación necesaria.

Todo o persoal educativo do CEIP de Vite “quere manifestar o seu descontento polas condicións nas que se iniciou o presente curso escolar debido a escaseza de persoal en relación ao incremento de necesidades xeradas no centro”.

A CIG Ensino quere denunciar os recortes que a Consellaría de Educación está levando a cabo para este curso facendo inviábel o normal desenvolvemento das aulas.

Neste curso aumentaron moito as necesidades educativas e a administración o que fixo foi recortar horas de pedagoxía terapéutica.

As necesidades mínimas reclamadas pola comunidade educativa pasan por dous mestres ou mestras de Pedagoxía Terapéutica a tempo completo e dúas coidadoras ou coidadores a tempo completo.

Por todo o anterior desde a CIG Ensino esiximos a dotación inmediata dos recursos humanos necesarios para o normal desenvolvemento do curso.