A CIG-ENSINO vén reclamando reiteradamente desde o mes de decembro que se convoque coa maior brevidade a Mesa Sectorial docente para tratar a convocatoria de oferta de emprego para este ano 2011. É preceptivo que sexa na Mesa Sectorial onde se negocie a oferta de emprego e só despois de celebrada a Mesa se poderá afirmar cal é a oferta, a que corpos e etapas abrangue e en cantos postos se concreta. Mentres esta Mesa non se produce, calquera información que se difunda será parcial e incompleta, o cal demostra a irresponsabilidade deste Conselleiro que segue abondando nun currículo que o fará pasar á historia como o peor Conselleiro de Educación da Xunta de Galiza.

As declaracións do Conselleiro sementan dúbidas sobre unha posíbel oferta de emprego en Secundaria e desde a CIG-Ensino consideramos que esta decisión ten que ser debatida na Mesa Sectorial.

Unha vez máis, a CIG-Ensino esixe do Conselleiro que abandone a propaganda e reclama a convocatoria urxente da Mesa Sectorial para tratar a oferta de emprego e que esta se faga pública para xeral coñecemento de todas as persoas que desexan acceder a ela.