Despois das mobilizacións do 1º de maio no que a CIG-Ensino saíu á rúa, en todas as cidades galegas, denunciando a sinatura do XII Convenio Estatal de Infantil, este martes 21 de maio as delegadas/os das escolas infantís de 0-3 anos volveron saír en Santiago, diante da Confederación de Empresarios de Galiza, demandando a retirada da sinatura, o próximo 22 de maio, do XII Convenio Estatal de Infantil por seguir afondando na precariedade laboral e salarial e por ser rexeitado maioritariamente polas traballadoras/es do sector. Ademais reivindicáronlle á patronal galega abrir negociacións por un Convenio Galego como única vía posible de lograr melloras laborais e salariais que dignifiquen o seu traballo.

Logo da concentración fíxose entrega por rexistro, na propia Confederación de Empresarios, de 558 sinaturas de traballadoras e traballadores que supoñen o 67% das 111 escolas visitadas dende o 2 de maio, nas que denunciaban o seguinte: 

1.- Que non se está a ter en conta no convenio estatal as reivindicacións laborais propias dos traballadores e traballadoras galegas, limitando a capacidade de influír na  negociación.

2.- Que as condicións que sofren os traballadores e traballadoras dos centros galegos afectados polo XI convenio colectivo estatal de Infantil son precarias e que se manterían de asinarse o XII convenio nos termos acordados. Esta precariedade só pode conducir a un deterioro da calidade dun servizo que debería procurar a mellora dos seus recursos materiais e humanos, no canto de centrarse en criterios mercantilistas.

3.- Que rexeitamos a sinatura do XII convenio estatal nos termos acadados o 25 de abril, cada vez máis lesivo para os dereitos laborais e salariais dos traballadores/as que impiden que poidan, estes últimos, realizar dun xeito digno o seu labor, resultando incluso discriminatorio coas categorías. Demandamos que non se leve a cabo esta sinatura do XII Convenio mañá 22 de maio e se negocie cara un acordo que recolla unhas verdadeiras melloras laborais e salariais que rematen nun CONVENIO DIGNO E XUSTO.

4.- Que demandamos que se inicien negociacións, entre patronais e sindicatos galegos, que nos permitan acadar un CONVENIO GALEGO que mellore substancialmente as condicións recollidas no convenio estatal, non só acercando a negociación ás traballadoras/es galegos, senón que poidan ser os verdadeiros protagonistas coas súas decisións e así dignificar as súas condicións laborais e salariais.

5.- Que estamos dispostas e dispostos a comezar un proceso de mobilizacións para exixir o cumprimento destas demandas, non desbotando a convocatoria de folga no sector de ser preciso. 

Esta entrega de sinaturas tamén se levará a cabo diante da Mesa de Negociación do convenio en Madrid mañá mércores 22, para denunciar e amosar o rexeitamento xeralizado das traballadoras/es galegas á sinatura do XII convenio estatal de infantil, freando a mesma e para que se negocien unhas melloras laborais e salariais acordes co traballo a realizar, á responsabilidade e ás exixencias e formación que cada vez se están a requerir no sector. 

Cómpre ter en conta que tras sete anos de conxelación salarial a única proposta de suba, fóra da aplicación da lexislación estatal do novo salario mínimo interprofesional aprobada polo goberno para todos/as os/as traballadores/as, foi pasar o salario das educadoras a 930€ comezando a pagalos dende o mes seguinte á data de sinatura do convenio, que será o 1 de xuño, e unha cláusula para que se convoque a mesa negociadora se hai modificacións no SMI para adaptar as táboas salariais ao mesmo. Non houbo ningunha mellora laboral en temas de permisos e xornada, continuando esta en 38 horas lectivas semanais, sen tempo para poder facer a programación en horario de presenza nos centros.