A CIG-Ensino e o profesorado CELGA realizaron un novo acto reivindicativo na mañá do mércores 14 de maio en Lugo que consistiu na simulación dunha aula na que se evidenciou o desleixo, o abandono e o maltrato da nosa lingua por parte da Consellaría de Educación. Nesta representación tamén se certificou que nin o Conselleiro de Educación nin o Presidente da Xunta obterían un Celga de nivel 2.

No acto léronse textos de Castelao intercalados coa denuncia sobre a situación laboral deste profesorado. Ademais púxose de manifesto o a deturpación do galego que fai a Xunta non seus anuncios publicitarios.

O acto de Lugo presentouno Xosé Ferreiro, da CIG-Ensino, e pechouno o Secretario Nacional  da CIG-Ensino, Anxo Louzao, quen deu as grazas ao profesorado CELGA que fixo esta exposición maxistral coa que se evidenciou a situación do idioma e o comportamento da Xunta. “Este conflito co profesorado CELGA é a mostra máis palpable das políticas que práctica a Xunta, que se converteu nunha fábrica de parados, non respecta os dereitos fundamentais e abandona o galego”, afirmou.

As accións contra os despedimentos de profesorado CELGA continuarán nos próximos días cunha recollida de sinaturas, a presentación dunha queixa no Valedor do Pobo e unha concentración o 14 de xuño coincidindo coa realizacións das probas de certificacións do CELGA.