O secretario nacional da CIG-Ensino, Anxo Louzao, e o presidente da Mesa Pola Normalización Lingüística, Marcos Maceira, presentaron este venres 16 de outubro, no Rexistro Xeral da Xunta, un escrito dirixido ao conselleiro de Política Social no que lle solicitan que actúe de inmediato e paralice a persecución que está a sufrir unha traballadora do centro Jungle World por empregar o noso idioma nas aulas que imparte. A CIG-Ensino e A Mesa esíxenlle ao conselleiro de Política Social que adopte as medidas pertinentes para garantir os dereitos lingüísticos de todo o persoal que traballa no centro, pero tamén unha oferta positiva do galego, tal e como establece a Lei de Servizos Sociais.

Ademais a CIG-Ensino e  A Mesa reclaman a apertura dun expediente sancionador á empresa  que mesmo remitiu unha circular interna prohibindo calquera comunicación en galego e advertindo que o incumprimento desta orde sería considerada “falta grave”.

“A Xunta de Galiza non pode mirar para outro lado. É tamén responsable do acontecido pola  política lingüística e o discurso que está levando a cabo e que alimenta actuacións como esta”, subliñou o secretario nacional da CIG-Ensino, Anxo Louzao.

Tamén o presidente da Mesa, Marcos Maceira, reclamou da Xunta que actúe de maneira inmediata. “Estamos a falar da prohibición de utilización dunha lingua oficial en Galiza. Detrás desta prohibición –dixo- o que hai é un odio á lingua galega que non se pode consentir e menos nun centro educativo”.

Marcos Maceira referiuse á valentía desta traballadora  que fixo posible que este caso saia á luz pública e lembrou tamén que son moitas as queixas e denuncias pola persecución ao galego que, ao longo do ano, chegan á Mesa pola Normalización Lingüística.

Escrito rexistrado hoxe e dirixido ao conselleiro de Política Social

NOVAS ANTERIORES

Un centro de atención á infancia prohibe o uso do noso idioma e ameaza con sancións graves ao persoal que empregue o galego