A CIG Ensino quere denunciar que o servizo de asistencia xurídica do que a Consellaría fixo alarde estes días pasados non só é unha privatización dun servizo que debería prestar a Consellaría e unha burla ao profesorado ao ultralimitar a súa eficacia, impedindo consultas que non lle interesen á Xunta de Galiza.

A Consellaría realiza un convenio cunha empresa de Madrid dedicada á asesoría xurídica telefónica. Non se está contratando un servizo propio e específico para a Consellaría de Educación da Xunta de Galiza, senón que se fai un convenio cunha empresa que atende desde Madrid. Estamos ante un engano máis da Consellaría, pois o telefono que  se facilita para información ( 902090354) nin sequera canaliza a consulta nin resolve as  preguntas. Constatamos como a empresa usa este servizo par gañar clientes,. Hoxe,  houbo  profesorado ao que, unha vez que lle responderon que o seu caso non esta contemplado no servizo contratado pola Consellaría, a empresa non tivo ningún repara  en  ofrecerlle os seus servizos pero, evidentemente, cobrando.   

Consecuentemente o profesorado galego atopouse xa coa dificultade derivada do feito de estar a empresa en Madrid: a empresa atende exclusivamente en español, impedindo na práctica a que o profesorado  use o galego na   interlocución coa empresa. A esta eiva súmase o descoñecemento absoluto de Galiza, as nosas especificidades territoriais e contexto sociocultural. Como vai interpretar e asesorar unha empresa de Madrid unha consulta sobre o uso do idioma galego? Que sensibilidade ten esta empresa co noso país e o noso idioma para asesorar debidamente o profesorado.

A Consellaría fai propaganda, levanta unha poeira enorme coma quen fixo algo inmenso e á hora da verdade malgasta o diñeiro público nun servizo que nin é propio, nin nos vai atender entendendo a nosa especificidade.

A Consellaría manipula, como cando traslada a través da TVG que este servizo vai ser gratuíto. Gratuíto non, sae dos orzamentos de Educación e significa unha redución doutras partidas, un gasto que non vai servir para nada. 

A CIG-Ensino xa lle trasladou á Consellaría na Mesa sectorial de onte día 19 o seu rexeitamento a este servizo polo xeito en que se puxo en marcha, polas súas limitacións e porque significa a privatización dun servizo que debería prestar a  propia Consellaría.