Hoxe 21 de agosto, como en anos anteriores en pleno período vacacional coa intención de que pase desapercibida para a sociedade galega, o DOG publica a ORDE do 10 de agosto de 2017 pola que se aproban os concertos educativos cos centros docentes privados de educación infantil, educación primaria, educación secundaria obrigatoria, educación especial, e de formación profesional.

Nesta orde aplicase á LOMCE en toda a súa crueza contra o ensino público galego, xa que a máis de manter os concertos aos centros que segregan por cuestión de xénero fixa a duración dos concertos en seis anos, cando isto só é preceptivo para a o ensino primario, é dicir, o goberno do Partido Popular na Xunta de Galiza, vai máis alá da LOMCE na defensa do Ensino Concertado.

En contraposición a este crecemento do ensino privado concertado temos que a mesma consellaría practica un recorte sistemático, inxustificado e inaceptábel no ensino público, suprimindo centros, unidades e profesorado.

O mantemento dos concertos aos centros educativos que segregan ao alumnado por razón de xénero (CPR Aloia, CPR Las Acacias, CPR Montecastelo, CPR Montespiño e CPR Peñarredonda) convértese na demostración de que este goberno do PP está disposto a favorecer a determinado tipo de centros, publicamente vinculados co Opus Dei. Recordamos que estes concertos mantivéronse de forma contraria á lei no seu momento.

A CIG-Ensino considera totalmente inaceptábel e un insulto á sociedade galega esta privatización do ensino e denuncia a intención permanente desta Consellaría de favorecer as patronais do ensino privado.