Desde a CIG Ensino esiximos a dotación inmediata do material necesario nos dous centros así como a dotación do profesorado necesario para o normal desenvolvemento do curso.

A CIG Ensino quere denunciar a absoluta chapuza que fixo a Consellaría de Educación coa apertura do novo CEIP de Oroso, no mesmo Concello.

O que debería ser unha boa nova e unha mellora na calidade do ensino convertese en todo o contrario. A dotación de material do novo centro (CEIP Oroso) é inexistente, e para solucionar transmiten a orde de que o profesorado transporte 1/3 do material do centro vello (CEIP Sigüeiro), sen máis aclaración ou explicación.

A división do alumnado entre os dous centros fíxose sen crear a comisión de escolarización, descargando a responsabilidade nas direccións dos centros e sempre buscando a solución a este ano, sen pensar que vai pasar nos anos sucesivos cando aumente, a matrícula, ou incluso este mesmo ano coas novas incorporacións que xa está habendo.

As aulas están máis masificadas con dous centros: varias aulas con máis de 25 alumnas e alumnos.

Menos profesorado de atención ao alumnado de Necesidades Educativas de Apoio Específico (NEAE): eliminaron unha mestra ou mestre de Pedagoxía Terapéutica e unha de Audición e linguaxe.

Eliminación dunha praza de coidadora, cando hai tres nenos que precisan de coidadora, só teñen 2 coidadoras.