A CIG-Ensino ante o anuncio feito público este mércores 11 de decembro polo conselleiro de Educación da oferta de “aproximadamente” 100 prazas en Secundaria para o ano 2014 quere manifestar o seguinte:

Trátase dunha oferta raquítica e totalmente insuficiente, tendo en conta que só en Secundaria hai máis de 3.000 interinos/as. 

Pretende ser un lavado de cara cando se produciron máis de 4000 xubilacións, se reduciron os cadros de persoal en 3.000 mil docentes e as necesidades de profesorado nos centros están sen ser atendidas.

Nos últimos tres anos non houbo oferta de emprego nestes corpos.

Nin sequera se cumpre co proxecto dos orzamentos da Xunta e do Estado que xa reducen a un  10% a taxa de reposición de emprego nas administracións públicas, o que leva consigo o aumento das interinaxes e a inestabilidade laboral.

Unha vez máis o conselleiro volve vulnerar os órganos de negociación ao realizar este anuncio á marxe da Mesa Sectorial e sen previa negociación coas organizacións como é preceptivo.