A CIG-Ensino considera que é un “despropósito” o nomeamento de Jesús Vázquez como conselleiro de Educación e Cultura. O secretario nacional de CIG-Ensino, Anxo Louzao, alerta da “grave involución”, que suporá para a Cultura galega dados os antecedentes que ten á fronte da consellaría de Educación e lamenta que se lle dea este "premio" como consolación por non ter conseguido un posto en Madrid que, afirma, “é ao que realmente aspiraba”.

Louzao lembra que se trata dun conselleiro que “foi rexeitado pola comunidade educativa pola súa nefasta xestión, polas súas agresións sistemáticas contra a nosa lingua, polos recortes que efectuou no ensino público e polos seus constantes ataques contra o profesorado”.

O secretario nacional de CIG-Ensino subliña que a súa cruzada contra o galego e contra o profesorado, o seu carácter ditatorial, a súa incapacidade para diálogo e, en consecuencia, a permanente imposición de medidas que tan negativamente afectaron ao ensino público, provocaron que a comunidade educativa, no seu conxunto, se mobilizara en innumerábeis ocasión e demandara o seu cese. “Iso é o que tería que ter feito Feijóo aproveitando esta remodelación de goberno, cesalo, porque demostrou a súa incapacidade para estar á fronte da consellaría de Educación”.

Para Louzao, se malia ter estes antecendentes estenden as súas competencias tamén a Cultura, isto só se pode entender se o que pretende Feijóo é que “continúe no seu roteiro de persecución agora non só contra o galego senón tamén contra a nosa cultura e os nosos sinais de identidade”.